Кечаги кун Роналдуга бағишланди: Ўйиндан олдин унинг гаджети, баҳсдан кейин эса футболчининг хет-трики муҳокама қилинди

"Кальяри" "Ювентус"га қарши баҳсда битта тайм дарвозасини қуруқ сақлади, аммо танаффусдан сўнг Роналду ишга киришди.

49-дақиқада у ҳимоячидан тўпни олиб қўйиб, дарвозабонни алдаб ўтди ва ҳисобни очди. 18-дақиқадан сўнг Криш Дибала ишлаган пенальтини голга айлантирди, яна бир дақиқа ўтиб португалиялик хет-трикни нишонлади.

4:0 - "Ювентус"нинг жорий мавсумдаги энг йирик ғалабаси. "Кекса синьора" 45 очко билан А Серия жадвалида пешқадамлик қилмоқда, аммо "Интер" уч очко орқада ва уларнинг захирасида битта ўйин бор. 29 очко тўплаган "Кальяри" 6-ўринни банд қилган.

Кечаги ўйин ҳақида бир нечта қизиқ маълумот:

- Роналду фаолиятидаги 56-хет-трикни қайд этди. Португалиялик бу кўрсаткич бўйича Мессидан (53та) яхшигина узоқлашиб олди.

- Роналду топ-5 чемпионатлардаги 36-хет-трикини (ЛаЛигада 34та, Англия ва Италияда 1тадан) нишонлади. Бу ерда ҳам португалиялик Мессидан (35та) олдинда.

- Криш А Серияда хет-трикга эришган биринчи португалиялик футболчига айланди.

- Бу Роналдунинг А Сериядаги дастлабки хет-трики.

- Криш Италия чемпионатининг сўнгги 5та учрашувида 8та гол уришга муваффақ бўлди.

- Португалиялик сўнгги 18 йил давомида (2003-2020) Европанинг топ-5 чемпионатларида гол ура олган ягона футболчи бўлиб турибди.

- А Серия - Роналду хет-трик қайд этган 10-турнир.

- Криштиану жорий мавсум А Сериянинг 15та учрашувида 13та гол уришга эришди.

Анъанага кўра, Роналду майдондан ташқарида ҳам диққатни ўзига тортмоқда. Ўтган ҳафтада португалияликнинг бир қўлидаги 800 минг долларлик соати ва заргарлик буюмларини муҳокама қилгандик.

Криш яна порлади. "Кальяри" ўйиндан олдин галстукига iPod Shuffle гаджетини қистириб олган эди.

Бундай плеер 2005 йил сотувга чиқарилган, ўша йили Роналду "Манчестер Юнайтед"даги фаолиятини бошлаган эди. Бу ҳафтада (11 январь куни) iPod Shuffle 15 ёшга тўлади.

Apple 2017 йилда ушбу моделни ишлаб чиқаришни тўхтатган, аммо бу гаджетни яхши кўрадиганлар ҳали ҳам орамизда мавжуд. eBay интернет дўконида ушбу плеер 20 доллар атрофида сотувга қўйилган. Apple 2010 йилда Shuffle ускунасини янгилашни тўхтатди.

"Шаффл"нинг бундай мухлиси борлигини ким ҳам билибди дейсиз

Ижтимоий тармоқларда плеер ҳақида муҳокамалар бошланиб кетди:

- "Мультимиллионер Роналду iPod Shuffle ва Apple компаниясининг стандарт қулоқчинларидан фойдаланмоқда, чунки бу гаджетлар ҳали ҳам ишлаяпти, сиз эса янги iPhone ва AirPods ларни кўтариб олиб, бошқаларга мақтанишни хоҳлайсиз".

- "Криштиану ҳали ҳам iPod Shuffle дан фойдалангани менга ёқди, чунки ўзим ҳам ҳозиргача ушбу гаджетни ишлатиб юраман".

- "Буюмлар модага тўғри келмай қолса, улардан шунчаки воз кечиб бўлмайди".

- "Криштиану Роналду 2020 йилда iPod Shuffle дан фойдаланиб, қалбимга илиқлик олиб кирди".

- "Йигит бир кун 500 000 долларлик Rolex таққан бўлса, кейингисида iPod Shuffle дан фойдаланяпти".