Кахи Махарадзе: "Пахтакор" ҳамиша қалбимда, юрагимда қолади"

- Узоқ танаффусдан сўнг яна "Локо"га қайтдингиз...

- "Локомотив" юксак мақсадларни ўз олдига қўядиган кучли жамоа. Бу ерга янги мақсад ва ниятлар билан келдим. "Темирйўлчилар" сафига ўтганимдан жуда хурсандман. Бу жамоада кучли, маҳоратли футболчилар, ижрочилар йиғилишган. Мен "Локо"га кўзланган мақсадларга етишиши учун ёрдам беришга келдим. Мен учун "Локо"га ўтиш қизиқарли туюлди.

- Сизни "Локомотив"га ўтишингизга нима тўртки бўлди?

- Айнан нимадир тўртки бўлиб бу ерга ўтдим дея олмайман. "Пахтакор" жамоаси учун берадиган нарсамни бериб бўлдим деб ўйлайман. "Шерлар" сафида кўплаб ютуқларни қўлга киритдим. "Пахтакор" билан уч марта Ўзбекистон чемпионлиги ва Ўзбекистон кубогини ютишга улгурдим. Бу ердаги миссиям ниҳоясига етди деб ўйлайман. "Пахтакор" жамоаси ҳамиша қалбимда, юрагимда қолади. "Пахтакор" - бу "Пахтакор". У ерда мен жуда кўплаб ажойиб дамлар, унутилмас лаҳзаларни бошдан кечирдим. Бунинг учун клубдаги барчага катта раҳмат айтаман ва миннатдорчилик билдираман. "Пахтакор" мухлисларига эса алоҳида ташаккур! Уларга ҳам катта раҳмат айтаман. "Пахтакор" бу халқ жамоаси. Бу клубни барча бирдек севади, ҳурмат қилади. Бу жамоани унутишнинг ҳеч ҳам иложи йўқ.

- "Локомотив" учинчи йилдирки чемпионликни мақсад қилиб курашиб келмоқда. Лекин бу жамоа ҳали ҳам ўз мақсадига эриша олганича йўқ. Кахи Махарадзе жамоанинг ушбу муаммосини ечими бўла оладими?

- Мен келиб жамоани тезда чемпион қиламан дея олмайман. Қўлимдан келганича "Локомотив"нинг муваффақияти учун ёрдам бераман ва жамоага фойдам тегиши учун жонимни бераман. Ўйлайманки, биз жамоа билан ўз олдимизга қўйилган вазифаларни аъло даражада уддалаймиз.

Шаҳбоз Беғамов суҳбатлашди.