Кавани ва Менье шартномасини икки ойга узайтиришни исташмади

Marca нашрининг хабарига кўра, жамоа ҳужумчиси Эдинсон Кавани клубнинг ЕЧЛдаги юриши учун амалдаги шартномасини икки ойга узайтиришни истамади. Уругвайлик ҳужумчининг шартномаси 30 июнь куни ниҳоясига етади.

RMC Sport нашрига кўра, жамоа ҳимоячиси Тома Менье ҳам 30 июнь куни клуб билан амалдаги шартномаси якунланиши ҳамоноқ жамоани тарк этади. Илгарироқ ушбу футболчи Дортмунднинг “Боруссия” жамоасига ўтиши ҳақида хабар берилганди.

Шу билан бирга клуб раҳбарияти “Севилья” жамоасидан ижарага олинган дарвозабон Серхио Рико билан келишувни 31 августга қадар узайтиришга эришди. Шунингдек, ушбу санага қадар ярим ҳимоячи Эрик Максим Шупо-Мотинг ва ҳимоячи Левен Курзава ҳам жамоада қоладиган бўлишди. Парижликлар Тиаго Силва билан ҳам шартномани 31 августга қадар узайтириш борасида музокара олиб боришмоқда ва бразилиялик ҳимоячининг август ойининг сўнггига қадар жамоада қолиш эҳтимоли юқори баҳоланмоқда.