Камолиддин Тожиев: "Ўринбоевнинг таклифи бор. Насиб қилса, у кетади"

"Бугун тезкор гол уришни мақсад қилгандик. Ҳисобда олдинга чиқиб олганимиздан сўнг рақиб ҳужумга ўтиши ва очиқ зоналарга эга бўлишимизни кутгандим. Кўплаб вазиятлар яратдик, аммо рақиб дарвозабони жуда яхши ўйин ўтказди. Биринчи бўлимда ҳаво ҳам иссиқ бўлди", - дея фикр билдирди Камоллидин Тожиев баҳс якунлангач.

- "Пахтакор" жарима майдончаси ичида жуда кўплаб вазиятлар яратмоқда, аммо улардан фойдаланиш оқсамоқда...

- Совуққонлик. Бундан аввалги ўйинларда кўплаб голлар ураётган эдик. Сўнгги икки учрашувда эса камроқ гол уришни бошладик. Лекин вазиятлар яратаётганимиз мени хурсанд қилмоқда.

- Вақти келиб Ўзбекистонда куз-баҳор тизимига ўтиш мумкинми?

- Бунга тайёр бўлиш керак. Айниқса майдонларни. Бизда қиш совуқ келади. Агар шароитлар ярата олсак, ўтсак бўлади. Ҳозирги иссиқ ҳавода футболчилар бироз чарчаб қолишмоқда.

- Муҳаммадали Ўринбоев Бельгия клубига ўтиши ҳақида хабарлар тарқалди. Шунингдек, Муҳаммадали Усмонов "Андижон" жамоасига ўтиши ҳақида хабарлар тарқалди...

- Ўринбоевнинг таклифи бор. Насиб қилса, у кетади. Усмонов ҳақида эса янгилик йўқ.

- Жамоага ёзги трансферлар ойнасида кучаядими?

- 2-3 футболчиларни олиб келишни режа қилганмиз. Маҳаллий ва легионер футболчилар.