ЖЧ-2026 саралаши. Эртага Тимур Кападзе 4-босқичга қуръа ташлайди

Осиёга ажратилган 8 та тўғридан-тўғри йўлланманинг 6 таси аллақачон ўз эгаларини топган. Учинчи саралаш босқичида ўз гуруҳларида учинчи ва тўртинчи ўринни эгаллаган жамоалар — Индонезия, Ироқ, Ўмон, Қатар, Саудия Арабистони ва БАА плей-офф орқали яна бир имкониятга эга бўлишади. Бу ўйинлар 8 октябрдан 14 октябрга қадар бўлиб ўтади.

Жамоалар учта жамоадан иборат иккита гуруҳга бўлинади. Фақатгина гуруҳ ғолиблари кейинги йилдаги мундиалга йўл олади. Ҳар бир гуруҳ марказлаштирилган майдонда (Қатар ва Саудия Арабистони мезбонлик қилади) ягона давра тизимида ўйналади.

Қура ташлаш учун саватчалар (ФИФА рейтингига қараб):

1-саватча: Қатар (ФИФА рейтингидаги ўрни: 53), Саудия Арабистони (58)
2-саватча: Ироқ (59), БАА (66)
3-саватча: Ўмон (79), Индонезия (118)

Ушбу гуруҳ босқичи якунлангач, ҳар бир гуруҳда иккинчи ўринни эгаллаган жамоалар 13 ва 18 ноябрь кунлари уй-сафар тизимида плей-оффда тўқнаш келишади. Бу босқич ғолиби Осиё қитъасидан ФИФА қитъалараро плей-офф турнирида иштирок этади.

Эътиборлиси эртанги қуръа маросимида Ўзбекистон миллий терма жамоаси бош мураббийи Тимур Кападзе қатнашади ва жамоалар қайси гуруҳдан жой олишини аниқлаб беради. Бироз аввал эртанги қуръанинг репетицияси бўлиб ўтди. Бу ҳақда Жамолиддин Бобожонов телеграмдаги каналида маълум қилди.