Жасур Яхшибоев: "АГМКдаги ўйинларим орқали миллий жамоадан чақирув олишни мақсад қилганман"

— "Пахтакор"дан кетиш ёки кетмаслик ҳақида узоқ ўйладим. Бу осон бўлгани йўқ. Лекин у ерда ўйин амалиётисиз қолгандан кўра ўйнашни афзал билдим. Очиғи, музокаралар давомида АГМКга ўтиш борасида бир тўхтамга келиш қийин кечди. Бироқ бош мураббий Миржалол Қосимов билан бўлиб ўтган суҳбатдан кейин АГМКга ўтиш қарорига келиш осон бўлди. Мураббийнинг ишончи мени янада руҳлантирди. "Пахтакор"да жароҳатдан сўнг асосий таркибга кириш имкониятим анча пасайиб кетганди. Ўзим учун ҳам АГМК чорлови қизиқарли ва муҳим бўлди. Буёғига яна майдонга тушиб, ўз кучимни кўрсатишим ва нималарга қодирлигимни исботлашим зарур. Янги жамоага мослашиш жараёни кун сайин осонлашмоқда. Албатта, тезда янги коллективга киришиб кетишнинг имкони йўқ. Лекин кўриниб турибди, жамоа аҳил. Ўйлайманки, тез фурсатда янги жамоага мослашиб, АГМК учун жон куйдириб ўйнайман. Менга имконият тақдим этгани учун клубга, ишонч учун Миржалол Қосимовга ташаккур билдираман. АГМК либосида жамоага фойда келтириш учун кучимни аямайман. Бу трансфер ҳар иккала тараф учун манфаатли бўлиши учун ҳаракат қиламан. АГМКдаги ўйинларим орқали МТЖ мураббийлар штаби эътиборига тушишни ва ўзимнинг оптимал формамни тиклашни мақсад қилганман. Қисқа фурсатда олмалиқлик мухлислар эътибори ва эътирофига лойиқ бўлишга ҳаракат қиламан.