Жалолиддин Машарипов Фаластин билан ўйиндан олдин мухлисларга мурожаат қилди

Машғулотлар жараёнини кузатиб футболчилар юзида тушкунлик йўқлигига гувоҳ бўлдик. Барча бир мақсад йўлида ҳаракат қилмоқда, иштиёқ юқори даражада. Юқоридаги сўзларимизга терма жамоа аъзоси Жалолиддин Машарипов ҳам қўшилган ҳолда, олдинда кутаётган учрашув ҳақида фикрларини билдириб ўтди.

“Саудия Арабистони билан кечган ўйинни эсдан чиқардик. Боиси, олдинда масъулиятли учрашувлар бор. Бу билан тўхтаб қолмаймиз, уч очко қўлга киритадиган баҳслар кутиб турибди. Мағлубиятни унутиб, Фаластинга қарши тайёргарликни давом эттиряпмиз. Кайфият аъло даражада. Эртанги рақиб ҳақида гапирадиган бўлсам, биринчи турда сафарда ўтказган ўйинимизни кўриб чиқдик. 

Мураббийларнинг кўрсатмалари асосида ҳаракат қиламиз ва ғалаба учун боримизни берамиз. Насиб қилса эртага мухлисларга манзур келадиган футбол намойиш этамиз. Ишқибозлардан стадионга келиб яна шундай қўллаб-қувватлашларини ва биз билан охиргача бўлишларини сўраб қоламан. Биз ҳам ғалаба билан уларни хурсанд қилишга интиламиз”, - деди Жалолиддин Машарипов.