Жаҳонгир Аҳмадов: “Насаф” билан ўйинда ғалаба қозонишимиз ҳам мумкин эди”

 Учрашув 2:2 ҳисобидаги жанговар дуранг натижа билан якун топди. Мазкур баҳсдан кейин термизликлар футболчиси Жаҳонгир Аҳмадов билан суҳбатлашдик. 

- “Насаф” билан учрашувдан олган таассуротларингиз қандай?

- “Насаф” билан учрашувда бизга очко жуда муҳим эди. Биз ҳам катта мақсадларни кўзлаган ҳолда майдонга тушдик. 2:0 ҳисобида ортда қолаётган бўлсак-да, йигитлар ўзларида куч топа олишди ҳамда охиригача курашдик. Иккита тўп киритиб олишда жамоамиз қаттиқ меҳнат қилди дея оламан. 

- Бу ўйинда ғалаба ҳам қозониш мумкинмиди?

- Албатта. Бу ўйинда ғалабани ҳам илиб кетишимиз мумкин эди. Ҳисоб тенглашганидан сўнг бизда яна бир нечта гол уриш учун имкониятлар юзага келди. Афсуски, омад келмагани туфайли имкониятларимиздан фойдалана олмадик. 

- “Сурхон” олдига қандай мақсадлар қўйилганди?

- Мавсум аввалида ҳар бир ўйинда ғалаба қозониб, мухлисларимизни хурсанд қилиш вазифаси қўйилган. Биз шуни амалга ошириш учун ҳаракат қилмоқдамиз. 

- Ортда қолган 24-турдан кейин жамоанинг очколари сони 22тага етди. Суперлигада қолиш вазифаси қанчалик бажарилди?

- Суперлигада қолиш вазифасини тўлиқ ҳал қила олмадик. Олдимизда иккита учрашув бор. Қолганларга нисбатан имкониятимиз юқори бўлса-да, аввалдан хулоса қилишимиз яхшимас. Шу сабабли қолган иккита учрашувда ҳам ижобий натижа кўрсатиш ва Суперлигада қолиш вазифасини бажарамиз. 

- “Сурхон” Суперлигада қолса жамоадаги фаолиятингизни давом эттирасизми?

- Олдиндан бирор нима дея олмайман. Ҳаммасини вақт кўрсатади. 

- Бу йил Суперлигада тўп суриш орқали қанчалик тажриба тўплай олдинги?

- Футболчи сифатида янада ўсишим учун фойдали бўлди. Суперлига доирасида қанча кўп майдонга тушсам, бу менинг ўсишим ҳам хизмат қилади.