Ихероуме Уче: "Эроннинг ўрнида Ўзбекистон бўлиши керак эди"

Марказий ўйинлардан бири Англия ва Уругвай терма жамоалари ўртасида бўлиб ўтади. Ким билади, балки бугун яна бир номдор терма жамоа билан хайрлашармиз? Шунингдек, дастлабки турда ғалаба қозонган Котд`Ивуар ва Колумбия терма жамоаларининг ўзаро ўйинига ҳам қизиқиш юқори. Дастлабки турда мағлубият аламини тотиб кўрган Япония ва Греция терма жамоалари ўйини ҳам анча шиддатли ўтиши кутилмоқда.

Биз бугунги ўйинлар олдидан Пахтакор жамоасининг собиқ нигериялик ҳужумчиси, бир неча йилдан бери Вьетнам чемпионатида тўп тепиб келаётган Ихероуме Уче билан боғланиб, унинг фикрлари билан қизиқдик.

- Уче, салом. ЖЧ-2014 ўйинларини кўриб боряпсизми?
- Албатта. Ҳар бир учрашувни катта қизиқиш билан томоша қиляпман. Айниқса, Нигерия терма жамоасининг ўйинини интиқлик билан кутяпман. Табиийки, биринчи навбатда ўз ватаним жамоасига мухлислик қиламан. Афсуски, старт унчалик ҳам ўхшамади. Эрон билан бўлиб ўтган ўйинда осиёликлар дарвозасига йўл топа олишмади. Ўзи аслида Эроннинг ўрнига Ўзбекистон терма жамоаси жаҳон чемпионатига бориши керак эди. Ўйлайманки, кейинги икки ўйинда вазиятни ижобий томонга ўзгартиришади.   

- Бугунги учрашувлардан нималарни кутяпсиз?
- Бугун Япония ва Колумбия терма жамоалари ғалаба қозонишади. Англия ва Уругвай ўйинида эса ғолиб аниқланмайди, яъни дуранг натижа қайд этилади.

- Ҳисоб қандай бўлишини тахмин қиляпсиз?
- Башорат қилишни ёқтирмайман, чунки ҳамиша ҳам тўғри чиқмаган. Шундай бўлсада, тахминимни айтаман. Колумбия  Котд`Ивуар - 2:0, Япония  Греция - 2:0. Уругвай  Англия - 1:1.

- Испаниянинг кетма-кет икки мағлубияти ва бунинг натижасида гуруҳнинг ўзида қолиб кетаётганини сиз ҳам ҳазм қила олмаган бўлсангиз керак?
- Бўлмасамчи. Амалдаги жаҳон чемпионларининг бу тарзда мундиални тарк этишларини ҳеч ким кутмаганди. Шу жумладан, мен ҳам. Начора, бу футбол. У эса шуниси билан қизиқ. Шахсий фикрим, Испания терма жамоасининг ўйинини рақиблар яхшигина ўзлаштириб олишган.   

Камолиддин АЛИМОВ суҳбатлашди