Иван Бошкович: "Натижадан қониқдим, ўйин борасида кучсизроқ эдик"

"Биринчи навбатда "Хоразм" жамоасини олқишламоқчиман. Мен натижадан қониқиш ҳосил қилдим. Лекин ўйин бўйича бу йилдаги энг кучсизи эдик. Қолаверса, иккинчи бўлимда қизил карточка ҳам ўйинга таъсир қилди. Шунга қарамай "Хоразм" юқори иштиёқ, босим билан ҳаракат қилди. Сифатли футбол кўрсатишга ҳаракат қилишди. Лекин футболда ҳамма нарса бўлади. Такрорлайман, натижадан кўнглим тўлди. Бундан ташқари Суперлигада тўғридан-тўғри қолиш масаласини ҳам ҳал қилдик. Орадаги терма жамоалар ўйинлари сабаб юзага келган танаффусдан фойдаланиб кейинги рақибга тайёргарликни давом эттирамиз. "Хоразм"га омад тилайман ва умид қиламанки кейинги йил Суперлигада ўйнайди",- дейди Бошкович.

- Жамоангиз ёмон ўйнаганини айтдингиз. Бу сунъий майдон билан боғлиқми?

- Майдон ўйнаш учун идеал эди. Ўйин бошидан охиригача сифатли хизмат қилди. Балки таъсир қилгандир. Аммо биз ишончлироқ, диққатни жамлаб ўйнашимиз керак эди. Ўйин темпини назорат қилишни айтдик, якунда гол урдик. Йигитлар тушунишди, керакли пайтда диққатни йиғиб олишди.