Иван Бошкович: "Ҳеч кимнинг бошини ёрмоқчи эмасман. Биз бундай ҳолатларга тайёр бўлиб боряпмиз"

- Ўйиндан кейин бирданига барчасини тахлил қилиш жуда қийин. Бу бугдай гол ўтказиб юборган биринчи ўйинимиз эмас. Ҳаммаси ўз қўлимизда бўлиб турган вақтлари ҳам бўлди, ўша вазиятларда гол урмаганимиз учун жазоландик. Ким томоша қилган бўлса, кўришди. "Бунёдкор" ғалабага лойиқ эмасди дея олмайман, улар ўйнашди, характер кўрсатишди, ўз вазиятларини кутишди. Иккинчи бўлимда рақибларда кўп ҳам вазият бўлмаганди. Берилган иккита зарбани дарвозабонимиз муваффақиятсиз қайтарди. Биринчи бўлимда ҳисоб 1:0 бўлиб турганида рақиб посбони билан бирга-бир ҳолатга чиқиб бордик. 2:2 ҳолатда ҳам шундай вазият бўлди. Энди бунинг учун ҳеч кимнинг бошини ёришни истамайман, чунки олдин ҳам шундай вазиятлар бўлганди. Биз бундай ҳолатларга тайёр бўлиб боряпмиз. Олдимизда бизни яна бир тур кутиб турибди. Унга тайёрланиш ва ҳолатни тўғрилаш керак. Жамоамда ўйин бор, биз кўп вазиятлар яратяпмиз. Ҳатто бугун иккинчи бўлимда тактикамиз иш берди. Тўп бизда кўпроқ бўлди. Ўз фалсафамиздан бироз чекиниб, олдинроқда прессинг қилдик. Бироқ вазиятларни голга айлантиришда қийналдик. Реализация бизнинг нозик нуқтамиз бўлиб турибди. Иккита гол урган бўлсак-да, бу ҳам камлик қиляпти. 

- Ўтган мавсум муваффақиятли ўтганди. Бу мавсумда эса ишлар унчалик яхши эмас. Муаммо нимада? Қишда селекция ишлари яхши амалга оширилмадими? Жароҳатланганлар кўпми?

- Билмадим. Лекин жамоанинг ўйини яхши. Ўтган мавсумда биз энг яхшиларидан бири эдик, статистика ҳам буни кўрсатиб бера олади. Бу йилги ўйин сифати ўтган йилгидан кўра яхшироқ ҳам. Олдинга паслар, қанотдан узатмалар, зарбалар ҳам кўпайган. Лекин позицион ҳимоядан голлар ўтказиб юборяпмиз. Қишда селекция ишлари ёмон бўлгани йўқ. Милан Митрович узоқ вақт жароҳатда бўлди. Шоҳруҳ Абдураҳмонов деярли бир йилдан буён даволанмоқда, ҳали ҳам сафда эмас. Лука Жоржевич ўзининг юқори жисмоний ҳолатига қайтмаган. Баҳона қилмоқчи эмасман, карточкалар, жароҳатлар режаларни ўзгартириб юборади. Иккинчи даврада ҳолатни тўғрилашимиз керак, олдимизда кубок ўйинлари ҳам бор. У ерда олдимизга вазифа қўйганмиз. Охиригача бориб, кубокни олишимиз керак. "Сўғдиёна"нинг совринлар ютадиган вақти келди, бу ушбу мавсумда бўлиши керак. Бор кучни кубокка ташлаймиз.

- Ёзда жамоа кучайтириладими?

- Албатта. Фақатгина биз эмас, барча жамоалар таркибини кучайтиради. Бизда ҳам кучайтириладиган нуқталар бор, рақобатни ошириш керак. Таркибни яхши кучайтирамиз. Осонликча таслим бўлмаймиз.

- Жасур Жалолиддинов ва Сардор Раҳмонов иккинчи даврада "Сўғдиёна"да ўйнайдими?

- Олдимизда бир тур бор. Шу ўйиндан кейин барчаси аниқ бўлади. Нимадир янгиликлар бўлса, эълон қилинади. Ҳозир биз ўйин ҳақида ўйлашимиз керак. Трансферларни гапиришга ҳали эрта.