Иван Бошкович: "Бугунги захирадан майдонга тушган барча футболчилар ўйинни кучайтиришди"

Ўйин ҳақида

- Бугун иккита гол уриб, ҳақли равишда ғалаба қозондик. Ҳамма йигитларни ғалаба билан табриклайман.

- Зенан Займович сиз келгунингизга қадар голлар урмаётганди, сиз келгандан кейин эса мана дубль қайд этди. Займович ҳақидаги фикрингиз?

- Ҳамма футболчиларда форма бўлади. Ҳар доим ҳам бир хил ўйнаб бўлмайди. Биз мураббийлар барча футболчиларга ёрдам бериш ва ўз даражаларида ўйнай олишларида кўмаклашиш учун шу ердамиз. Биздаги барча ўйинчилар жуда юқори даражаги футболчилардир. Олдин ҳам буни айтганман. Барча мураббийлар штаби аъзолари бу каби ўйинчилар билан ишлашдан завқ олишяпти. Менимча, биз бундан ҳам яхшироқ бўла оламиз. Тўхтаб қолиш керак эмас. 

- Бу ўйиндаги таркибни кейинги ўйинда ҳам сақлаб қоласизми?

- Бугунги ўйинда захирадан майдонга тушган барча футболчилар ўйинни кучайтиришди. Ҳамма ўйинчиларим мен учун жуда муҳим. Ҳар доим қайтараман, барча ўйинчиларда майдонга тушишга имконият бор. Захирадан майдонга тушаётган ҳар бир футболчи ўйинни кучайтириши лозимлигини билиши керак. Мен учун барча ўйинчиларим асосий 11 талик таркиб учун номзод ҳисобланишади. Мен мураббий сифатида ким майдонга тушса ҳам, ўйин услуби ўзгармасдан қолишини истайман. Ким захирадан ўйинга қўшилса ҳам жамоа ўйини яхшироқ томонга ўзгариши керак.