Испания футболи тарихида илк маротаба эркак ўйинчи туғруқ таътили олиши мумкин

Бу воқеа замирида ҳам оддий, ҳам бемаъни туюладиган вазият ётади. Баҳордаёқ Круз жамоадан кетмоқчи эканлигини маълум қилганди. "Леганес" Сегундага тушиб қолгач, у ўзини клуб келажагида кўрмайди. Бироқ раҳбарият ўйинчи учун қатъий талаб қўймоқда: шартномада кўрсатилган 10 миллион евродан кам товон пулига рози эмас.

Футболчига қизиқиш билдирганлар оз эмас эди. "Райо Вальекано," "Алавес" ва Португалия клублари 5 миллион евро эвазига ўйинчи ҳуқуқларининг 60 фоизини сотиб олишга тайёр эди. Аммо "Леганес" таклифни қабул қилмади: чунки қолган 40 фоиз ҳуқуқ ҳали ҳам "Бетис"га тегишли, клуб эса молиявий зарар кўришни истамайди.

Бу вақт ичида Круз мавсумолди тайёргарлигини ўтказишдан бош тортди ва янги мавсум учун рўйхатга киритилмади. Ҳозирда у жамоа билан машғулот ўтказаётган бўлса-да, майдонга тушишдан бутунлай воз кечди – фақат тўлиқ трансфер ёки шартнома бекор қилинишини кутмоқда.

Яқин кунларда футболчининг оиласида чақалоқ дунёга келади. Шу муносабат билан Круз расмий равишда ота сифатида бола парвариши таътили учун ариза беришга тайёр. Агар бу воқеа амалга ошса, у Испания профессионал футбол тарихида бола парвариши бўйича таътилга чиққан биринчи эркак бўлади.