Исломбек Исоқжонов: "Олмалиқ" билан бир йиллик шартнома туздим"

21 ёшли ҳужумчига айниқса "Олмалиқ" жиддий таклиф билан чиқди. Шу боис наманганлик футболчи Игорь Шквирин бошқарувидаги жамоа йиғинига бориб қўшилди.
Ўқувчиларимизга яхши маълумки, Игорь Анатольевич биринчи лигадаги футболчиларни ҳам доимо кузатиб боради. Айниқа унда ўзини кўрсатаётган тўпурарларни ўз жамоасига таклиф этиб, кашф этиб келган. Мўйдин Мамазулумов бунга яққол мисол бўла олади. Бугун "Олмалиқ" биринчи йиғинини якунлади. Шундан сўнг Исоқжонов билан қисқача суҳбатлашдик.

- "Хотира-79"да ўйнаб юрган пайтларимда, Тошкентга бир неча сафарга келиб чемпионат ўйинларида иштирок этдик. Айнан мазкур ўйин чоғида "Олмалиқ" мураббийлари ўйинимни диққат билан кузатган. Кейин адашмасам, бундан 2-3 ой илгари таклиф билан чиқишганди", - дея гап бошлади Исломбек Исоқжонов.

- Шундан сўнг уларга ваъда бердим ва биринчи даврадан сўнг жамоа йиғинига бориб қўшилдим. Аслида олий лигада ўйнаш вақти келганди. Шунингдек элита жамоасида ўйнаш иштиёқи юқори эди. "Олмалиқ" мен учун энг қулай вариант бўлди деб ўйлайман.

- Иккинчи даврани эндиликда "Олмалиқ"да ўтказишим аниқ бўлиб улгурди. Яқинда жамоа билан бир йиллик битимга имзо чекдим.

- Янги клубда мени илиқ кутиб олишди. Футболчиларнинг айримлари билан танишман. Қолганлари билан энди-энди танишиб бормоқдамиз. Хулласа киришиб кетишим осон бўлди.

- Йиғин давомида ўтказилган синов-назорат ўйинларида мураббийлар мени ҳам синаб кўрди. Машъалга қарши баҳсда майдонга тушдим. Ёмон эмас. Насиб қилса бу ерда ҳам ўзимни кўрсатмоқчиман.

- Аввалги жамоам "Хотира-79" билан дўстона хайрлашдим. Раҳбарият ва мураббийлар менга янги жамоада омад тилади. Кейинчалик ҳам бу жамоага бефарқ бўлмайман", - дейди Исоқжонов.