Ислом Тўхтахўжаев Купернинг илк талаби қандай бўлганини айтди

"Кеча биз учун керакли ўйин бўлди. Айта оламан, Ўзбекистон термасига натижа муҳим эмасди. Янги мураббийнинг кўрсатмаларини тўлиқлигича бажаришга ҳаракат қилдик. Мухлисларнинг норози бўлаётганини тушунса бўлади. Аммо, мураббий эндигина келди, унинг фаолияти яқиндагина бошланди. Ўйин сифатимизни қадам ва қадам яхшилаб борамиз. Барчасини оддийликдан бошлаш керак.

Эктор Купер барибир топ-мураббийлар қаторига киради, унинг ўзига ҳос услуби бор. Буни машғулотларда кўриб бормоқдамиз. Ҳозирча унинг машғулот даражаси борасида фикр билдиришга эрта деб ўйлайман.

Икки ўйиндаги тактикада ўзгаришлар бўлмади. Бош мураббий бизга бир хил талаб қўйди. У илк навбатда, ишни ҳимоядан бошлаш кераклигини тушунтирди. Аста-секинлик билан ўйинимиз очилиб боришига ишонаман.

Эрон ва Сурия каби термалар билан ўйин ўтказдик. Барибир Эрон кучли терма. Шу боисдан уларга қарши шундай ўйинлар кўпроқ бўлгани фойдали бўлади. Бироқ биз бу баҳсларда натижага эътибор бермадик ва эътиборни асосий муаммоларни тўғрилашга қаратдик", - деди Ислом Тўхтахўжаев.