"Иқтидорли мураббийлар" конференцияси ўтказилди

Ўзбекистон футбол ассоциацияси томонидан ташкил этилган мазкур конференциясида мамлакатимизнинг барча вилоятларидан ташриф буюрган 110 дан ортиқ болалар футболида фаолият юритувчи мураббийлар иштирок этишди.

ЎФА вице-президенти Одил Аҳмедов ушбу лойиҳа футболимиз учун муҳим экани, иқтидорли мураббийларгина ўзбек футболининг янги юлдузларини кашф эта олишини таъкидлаб, сўнгги йилларда мамлакатимизда футболни ривожлантириш бўйича олиб борилаётган ислоҳотларни эътироф этди.

Ўзбекистон футбол ассоциацияси раҳбарияти томонидан мураббийлар таълимига жиддий эътибор берилмоқда. Конференция давомида ЎФА техник директори Ги Киала, шунингдек, Рўзиқул Бердиев, Александр Хомяков, Жасур Абдураимов сингари тажрибали мураббийлар ўз билим ва кўникмалари билан бўлишдилар.

Конференция дастуридан ўзбек футболи фалсафаси, замонавий футболда диетологиянинг аҳамияти, футболчиларни тизимли ва узоқ йиллик режа асосида тайёрлаш, уларни психологик жиҳатдан тўғри йўналтириш ҳамда футбол академиялари фаолиятида рақамли технологиялардан самарали фойдаланиш мавзулари ўрин олган бўлиб, ушбу масалалар қизғин муҳокама қилинди.