Иордания мураббийи: «Биз Уругвайдан кўп нарса ўрганишимиз керак»

Ўйиндан кейин ташкил этилган матбуот анжуманида иорданлар устози Ҳоссам Ҳассан жамоаси Уругвайдан кўп нарса ўрганиши кераклиги ҳақида гапирди.

“Мен якуний натижадан жуда хафаман, - деди мисрлик мураббий. – Аммо шу ўринда шогирдларимнинг мана шундай қийин беллашувда охиригача тўп суришганини ҳам таъкидлаб ўтишим керак. Бугунги йирик мағлубиятда айбни тўлиқ ўз зиммамга оламан. Шогирдларимнинг ҳеч бири тўғрисида танқидий фикр билдирмоқчи эмасман. Уругвай – жаҳон миқёсидаги жамоа ва улардан кўп нарсани ўргансак арзийди”.

“Бизда ҳам вазиятлар бўлди, лекин тўп кирита олмадик. Қолаверса, ҳимояланишда хатоларга йўл қўйдик. Ўз майдонимизда мухлисларни хурсанд қилишни мақсад қилгандик, аммо буни уддалай олмадик. Сизга айтсам, Австралия, Ж.Корея, Япония сингари Осиёнинг энг кучли жамоалари ҳам йирик ҳисобларда мағлуб бўлишган ва энг муҳими, улар мағлубиятдан тўғри хулоса чиқара олишган. Биз ҳам ривожланиш учун мана шу йўлни танлашимиз лозим.”

“Айтиб ўтганимдек, йирик мағлубиятда ҳеч бир шогирдимни айблай олмайман. Чунки ўйинчиларнинг аксарияти бундай кучли рақибга қарши биринчи бор майдонга тушишди. Ўйлайманки, якуний ҳисоб ўйинга мос эмас, сабаби рақиб бизни ҳимояга қамаб қўйгани йўқ. Шогирдларим қўлдан келганча ҳаракат қилишди, аммо рақиб сафида моҳир футболчиларнинг кўплиги Уругвайнинг ғалабасига хизмат қилди”.

Х.Холиқов тайёрлади.