Интервью. Жозе Моуриньо: “Клуб ва мухлислар мендан муҳимроқ”

Унда “ўзгача” мураббий клуб, режалари ва турли масалалар хусусида берилган саволларга атрофлича жавоб қайтарди.

- Ҳозирда “Юнайтед”да мавжуд футболчилар ҳақида дастлабки таассуротларингиз қандай?
- Ҳали барча ўйинчи клуб ихтиёрига мавсумга тайёргарликни бошлаш учун етиб келмади. Уларнинг кўпчилиги шу ерда ва менда яхши таассурот қолдиришди. Бундан ажабланмадим, чунки шу каби юқори савияда фақат профессионаллар ўйнай олишади. Уларнинг ҳаммасини ишлашни истайди, лекин улар қандай ишлаётганидан катта таассуротга эга бўлдим.

Масалан, Хитойда кунига икки маҳалдан машқ қиляпмиз ва бунда ўзини ортиқча уринтирмаслик ҳам мумкин. Футболчиларга иссиқ иқлим, бу ердаги қуруқ ва тўп секин юрадиган майдон таъсир кўрсатмоқда. Осонгина “Менга учиш таъсир қиляпти, жуда ёмон ухладим” деб баҳона қилиш мумкин. Лекин учиб келган кунимиздаёқ тушликдан сўнг ҳомийлар тадбирида иштирок этдик, шунга қарамай, машғулот фантастик тарзда кечди! Ишга ёндошувни шундай баҳоладим. Улар ишлашни ва яхшироқ ўйнашни хоҳлайди. Албатта, улар кўп тер тўкиши керак бўлади. Фаолиятим мобайнида мен тўқнаш келган энг қийин нарса янги клубга келганда ўйинчилар фикрлаши, ҳаракатланишини ўзгартиришдир. Улар аввал автоматик бажарган нарсалари устида ўйлаб кўришларини истайман. Ўзимдан олдинги мураббийларни камситмоқчи эмасман. Эҳтимол, мендан кейин клубларни қабул қилиб олган мутахассислар ҳам уларнинг ҳаракатланишидан норози бўлгандир.
Ўйинчилар учун бу осон вазифа эмас. Чунки улар бирор ишни ўз-ўзидан бажаришади ва буни ўзгартириш енгил кечмайди. Улар максимум эътиборни сақлашлари лозим. Футболчилар ўзгаришларни муваффақиятли уддалашади. Охирги кунларда Руни, Смоллинг ва Рэшфорд уйда қолган бир неча футболчиларни алмаштириб, жамоа савиясини кўтаришди.

Якшанба куни эса икки нафар ёрдамчим Манчестерда қолган футболчилар билан бирга тайёргарликни бошлади. Аста-секин бу жараённи босиб ўтамиз. Бунда ўйинчиларнинг ҳам жамоа қуришни хоҳлаши жуда муҳим.

- Златан Ибрагимович 34 ёшида Премьер-лигага таъсир ўтказа оладими?
- Шубҳасиз. Биринчидан, уни яхши биламан. Ҳамиша ёш фақат маълумот учун керак деб ҳисоблаганман. Мен учун инсоннинг ҳақиқий ёши паспортида ёзилгани эмас. Унда шунчаки туғилган санаси кўрсатилади.

Инсоннинг ҳақиқий ёшини унинг танаси, мияси ва ишга муносабатидан аниқлаш мумкин. Айта оламанки, Златан ҳали ёш ва унинг танаси шунчаки ажойиб! Унга футболгача бўлган машғулотлари, айниқса жанговар яккакурашлар билан шуғуллангани таъсир кўрсатган. Улар Златанни ҳам куч, ҳам руҳий тарафдан жуда яхши тайёрлаган. Унинг иштиёқи бошқа оддий футболчиларникидан катта фарқ қилади.

Тан оламиз, Ибрагимович жуда бой. Фаолиятим давомида кўп пул ишлаб топди ва совринлар ютишга эришди. Шу сабабли у жаҳондаги энг қийин чемпионатга пуллар учун эмас, унга таъсир кўрсата олишини ҳис қилгани учун келмоқда. Агар у буни ҳис қилмаганда яхшироқ таклифлар бор эди – АҚШ, Хитой ёки Франциянинг ўзида яна бир йил қолиши мумкин эди. Лекин у яна бир чақириқ олишни хоҳлади.

Унга мен Англия, Испания ва Италияда ғалаба қозонганимни айтганимда, унда Испания, Италия ва Франциядаги ютуқлар бор эди  – у ўйлаб кўрди ва бу ерга келишини, ҳар ерда ютуқни хоҳлашини айтди. Унинг иштиёқи жуда юқори ва танаси яхши ҳолатда. Якшанба куни Златан машғулотга киришди ва пайшанба кундан умумий гуруҳга кўшилади. Унгача мураббийлар беш кун фақат у билан махсус дастур асосида ишлашади.

- Жамоа Ибрагимовичда бор хусусиятлар билан кучаядими?
- Бир қатор одамлар жамоамизда етакчи йўқлиги, кимдадир нима етишмаслиги ҳақида гапиришмоқда. Бизга ҳамма футболчи ўзаро ўхшаш хусусиятли бўлиши керак. Мен ўйинчилар ўртасидаги тушунишни яхшилаб, уларни умумий руҳлантиришни ёқтираман. Уларга машғулотларда кўплаб кўрсатмалар берамиз.

Футболчилар билан ўйин чоғида мулоқот қилишим қийин. Шунинг учун майдонда биз хоҳлайдиган ўйинни тушунадиган ва ўқийдиганлар бўлишим муҳим. Златан улардан бирига айланади ва бизда у каби яна бошқа ўйинчилар ҳам борлигини кўряпман. Бизда қандайдир муаммолар юзага келади деб ўйламайман, бизда яхши савиядаги жамоа бор.

Ҳужум чизиғимизга қарасам - Златан, Рэшфорд, Руни, Мхитарян, Мата, қанот футболчилари, бизда чиройли футбол ўйнаш ва голлар учун барча нарса етарли эканини кўраман.

- Қандай ҳисоблайсиз, сизга “Юнайтед”ни бошқариш тақдир томонидан белгиланганми?
- Биргина ўйлаган нарсам ҳар бир бошқарган клубим “Манчестер Юнайтед”га қарши ўйнаб келган. “Порту”, “Интер”, “Реал” – барчаси! Ўша ўйинлар Чемпионлар лигасида кечган, катта баҳслар. Кейин “Челси” билан совринларни ҳал қилган чемпионат, кубок ва суперкубокдаги учрашувлар.

Жамоага қарши кўп бор ўйнаб, бу ерда нимадир нотўғри экани, шунча беллашувда бирор муаммо бўлмаганини ўйлаганман. Бир рақиб билан шунча марта жанжалсиз ўйнаш деярли имконсиз. Карточкалар ёки ранжитган сўзларсиз. Кўп марта ютганман ва ютқазганман, бирор салбий ҳолат юзага келмаган.

- “Порту” билан биринчи учрашувдан кейинги салбий ҳолат-чи?
- У сэр Алекс томонидан бўлган, мен тарафдан эмас. Шахсан менда клуб билан ҳамиша яхши муносабат бўлган. Умид қиламанки, ишқибозларда ҳам шундай. “Олд Траффорд”да ўйнаганимизда трибунадан туннелгача бориш доимо ёққан. Бошқа стадионларда бундай ҳолат бўлмаган. Бу ерда ҳар доим мухлислар билан алоқа юзага келади.

- Ўшанда кун келиб шу жамоага бошчилик қилишни тасаввур қилганмидингиз?
- Ҳамиша нимадир рўй бериши керак бўлган нарсани билганман. Ва бу амалга ошди.

- “Юнайтед”ни чўққига қайтариш вазифаси сиз учун нимани англатади?
- Бу вазифа клуб ва мухлислар учун менга қараганда муҳимроқ. “Манчестер Юнайтед” ва клуб мухлислари мендан муҳимроқ. Ўзим учун эмас, клуб ва ишқибозлар учун ишлайман – ишимга айнан шундай муносабатда бўламан.

Ўзим ишлаган клублар билан совринларни ютганманми? Ҳа, бу ажойиб бўлади. Барча жамоаларимни чемпионга айлантирсам, жуда яхши бўларди. Аммо бу ўзини ўйлашдек гап, бундай муносабатни хоҳламайман. Клуб менга ишонгани учун таклиф қилди, улар учун ишлайман.

Мен мухлислар менга ишонаётганини ҳис қилаётгандекман. Албатта, кўпчилик қисми. Улар клубга ёрдам беришимга ишонишади. Футболчилар борасида ҳам шундай сезги мавжуд. Уларга жаноб ван Гал ёқмаган деб гапирмаяпман. Бу ерга келганимдан кейинги таассуротларни айтяпман. Ўйинчилар билан аллақачон яхши муносабатга киришиб кетдик. Уларга етакчилик мавқем ва иш услубим ёқади. Келажакда ҳам шундай бўлишига умид қиламан. Бизни катта мавсум кутмоқда ва ундан завқ олайлик.

- Янги клубингизнинг мавқеи ва катталигини ўзингиз ишлаган бошқа жамоалар билан солиштирса бўладими?
- Таққослашни истамайман, чунки барча клубларимга ҳурмат билан муносабатдаман. Клубнинг ҳажми, мақсадлари, босими аҳамиятга эга эмас – ҳамиша бирдек ишлаб, боримни бераман.

Жаҳондаги катта клубларида ишлаш насиб қилган. “Манчестер Юнайтед” мен берадиган баҳога муҳтож эмас, чунки ҳамма бу клуб нима эканини билади. Бу синовни фаолиятимнинг тўғри қисмида қабул қилдим. Синов учун етарлича тажриба тўпладим. Бунга тайёрлигимни биламан. Ишга киришаётиб ўзимни хотиржам ҳис қилдим.

- “Челси”да ишлаган пайтингизда “Юнайтед”га сотиб юборилган Хуан Матанинг жамоангизда келажаги борми?
- У буни сўрагани учун сотишга рози бўлганман. Собиқ клубимда ҳеч ким уни сотиб юборишни истамаганди. Бу унинг қарори бўлганди. Ҳа, у танловимда биринчи эмасди, аммо ҳар бир ўйинда иштирок этган. Хуанни 18 футболчи рўйхатидан чиқариб юбормаганман. Баъзида у захирада қолиб кетарди.

“Манчестер Юнайтед” каби кучли жамоадан таклиф олганимиз туфайли уни қабул қилишга лойиқ деб ҳисобладик. Уч йил олдин ўша миқдор яхши пул саналарди. Ҳозир нархлар шунчаки ҳайратда қолдирмоқда ва энди уч йил аввал тўланган сумма кўпдек кўринмайди.

Хуан кетишни хоҳлади. Фалсафам шундайки, клубдан кетишни истаган ўйинчиларни ушлаб турмайман. Жамоамда ўша ерда ўйнашни истаган ўйинчиларим бўлиши муҳим. Шу тариқа таклифни қабул қилиб, Хуанни “Юнайтед”га сотганмиз.

Ўйлашимча, биринчи иш кунимдан барчасини аниқлаштириб олдик. Унга жамоамда жой бор. У – иқтидорли футболчи, бироқ ҳеч бир ўйинчига ваъда беролмайман. Уни ҳурмат қилишга сўз бераман. Хуан менга ёқади ва қолишни хоҳласа, унга жой ҳамиша топилади. Кетиши тўғрисида бирор белги бергани ҳам йўқ. У клубга ҳали кўп фойда келтиришига ишонаман.

- Погба 100 миллион фунт турадими ва уни “Ювентус”дан олиб қўя оласизми?
- Бошқа клублар ўйинчиларини муҳокама қилмайман. У – “Ювентус” футболчиси. Қайсидир клуб футболчимни сотиб олишни истаб, бу тўғрида ҳар ерда гапирса, менга ёқмайди. Шундай экан, Поль Погба бошқа жамоа ўйинчиси ва нима қилсак ҳам барини тўғри, қоидаларга мос равишда амалга оширамиз.

Ягона айтадиган нарсам, трансфер бозорида олдимиздаги 75 фоиз ишни уддалаб бўлдик. Ўзимизга керакли 4 футболчини белгилаб олгандик, унда номлар эмас, хусусиятлар акс этганди. Ҳозиргача ўша режанинг тўртдан уч қисмини адо этдик. Энди бизга қолган 25 фоизни 31 августга қадар уддалаш қолди холос. Сиз айтган ўйинчи рўйхатимизда ягона эмас. Ҳар бир хусусиятли футболчи учун турли вариантларга эгамиз ва айни пайтда тўртинчи футболчи билан шартнома имзолашга яқинмиз. У сиз ўйлаётган ўйинчи бўлмаслиги ҳам мумкин.

- Сиз ўша футболчини олган тақдирингизда “Юнайтед” бош совринга қанчалик яқин бўлади?
- Мен рақибларга синов ташлашни истайман.

- Май ойида жамоа совринга даъвогар бўладими?
- Билмайман, лекин шуни хоҳлайман. “Юнайтед”нинг охирги уч мавсумини яширишни истамайман. Улардан иккитасида жамоа кучли тўртликка ҳам кирмади, буни баҳона қилмоқчи эмасман. Мақсадимиз тўртинчи ўрин демайман, ундан юқори ҳар бир поғона ажойиб мукофот бўларди. Мен чемпион бўлишни истайман ва футболчилар шуни ҳис қилишларини хоҳлайман. Бирор клуб биздан ўтиб кетган тақдирда уларга табригимни йўллайман, лекин мавсумни бошлаб берувчи ҳуштакка қадар чемпион бўлишни хоҳлайман.

- Тўртинчи трансферни қачон якунлашни режалаштиряпсиз?
- Имкон қадар тезроқ, лекин 31 августгача бўлган ҳар қандай сана ёқимли.

- Уэйн Руни сардор бўлиб қоладими?
- Албатта.

- “Челси”га иккинчи бор келганингизда у ерда узоқ вақт қолишингиз мумкинлигини айтгандингиз. “Юнайтед”да уч йилдан ортиқ қолишингизни тасаввур қила оласизми?
- “Челси” хўжайини мени мураббий сифатида кўришни истамагани учун у ерда бош мураббий ишламаяпман. Агар Абрамович буни хоҳлаганида ҳамон ўша ерда бўлардим. Ҳозир “Юнайтед” билан шартномам бор ва клуб хўжайинлари барчасидан қониқмоқда. Менга келишувни давом эттиришни таклиф қилишса, мен хурсанд бўламан. Чунки ҳозир ўзим бўлишни истаган ердаман. Клуб тўғри қарорга келганини исботлашга уринаман.

Беҳзод НАЗАРОВ тайёрлади.