Илёс Зейтуллаев: "Бунёдкор" ПФЛ тақдим этаётган тақвимни ҳурмат қилади"

- Ўйин ҳақида фикрингиз?

- Ҳаммага хайрли кеч. Бугунги баҳснинг биринчи таймида жамоамиз ўзининг энг яхши ўйинларидан бирини кўрсатди. Оғир майдонда яхши ҳаракат қилдик. Оғир деганим майдон сифати билан боғлиқ. Бу эса ўйинимизга ўз таъсирини кўрсатди. Футболчимиз қизил карточка олганидан кейин ҳам ўйинни тўғри йўлга қўйишга ҳаракат қилдик. "Қизилқум" ўз майдонида яхши футбол намойиш этишини инобатга олган ҳолда тайёрланиб келгандик. Энди тезроқ тикланиб "Бухоро" билан баҳсга ҳозирлик кўришимиз керак. Бу ўйин ҳам биз учун финалга хос бўлади.

- Ўйинлар ораси қисқа бўлаётгани жамоангизга ўз таъсирини кўрсатяптими?

- Албатта, бу ҳам таъсир қилади. Яъни футболчиларнинг тикланиш жараёнига таъсир қилади. Биринчидан сафарлар бор, иккинчидан ҳар тўртинчи кунда ўйин ўтказяпмиз. Масалан, яна тўрт кундан кейин "Бухоро" билан майдонга тушамиз. "Бухоро" эса кеча ўйнади. Лекин биз бу билан эътироз билдирмоқчи эмасмиз. "Бунёдкор" ПФЛ тақдим этаётган тақвимни ҳурмат қилади. Аммо иккинчи томондан қисқа кун оралиғида ўтаётган ўйинлар барибир жамоа ўйин услубига таъсир қилади. Биз эса ишлашда давом этамиз. Мавсумни кўтаринки кайфиятда тугатишни мақсад қилганмиз.

- Оғир майдон ва четлатишни ҳисобга олмаганда яна нима етишмади?

- Ўйлайманки, биз яхши ўйнадик. Учрашув назоратимиз остида ўтди. Балки футболчимиз майдондан четлатилмаганида яна гол урган бўлармидик. Бу ҳақда аниқ бир гап айта олмайман. Бу футбол. Ўша вазиятда ўйинчимиз қўпол хатога йўл қўйди. Мен ҳам олдин футбол ўйнаганман ва бундай ҳолат исталган футболчи билан содир бўлишини яхши тушунаман.

- "Бунёдкор" бугун икки очко йўқотдими ёки бир очко олдими?

- Агар биринчи таймдаги вазиятларни ҳисобга олсак, биз икки очко йўқотдик. Иккинчи таймга келадиган бўлсак, майдонда ўн киши бўлиб қолдик ва устунлик рақиб томонга ўта бошлади. "Қизилқум" жисмоний футбол таклиф қилди, битта гол ҳисобга олинмади. Шу боис қўлга киритилган бир очкони ҳам Навоийда кичик "олтин"ни қўлга киритдик деб айта оламан. Тўғриси, бу ерга ғалаба қозониш учун келгандик.

- Янги қоидага кўра, фақат жамоа сардори ҳакам билан гаплашиши мумкин. Аммо бугун кўрдикки, баҳсли вазиятларда кўплаб ўйинчиларингиз ҳакамнинг олдига борди.

- Ўйлайманки, бу қоидага секин-аста мослашиб борамиз. Чунки бунгача бундай қоида йўқ эди. Бу ўринда футболчиларни ҳам тўғри тушуниш керак, ҳамма бирданига янги қоидага мослашиб кетмайди. Футбол эҳтиросли ўйин ва ютишни хоҳласанг ҳамма ишни қилишга ҳаракат қиласан. Ҳечқиси йўқ, секин-аста қоидаларни ўзлаштириб борамиз. Биз ҳакамларни ҳурмат қиламиз.