Илҳом Мўминжонов: “Ўзгаришлар ўз самарасини берди”

Илҳом Мўминжонов (“Навбаҳор” бош мураббийи): - Аввало, жамоамиз мухлисларини қийин ғалаба билан табриклайман. Шогирдларим кўрсатмаларимни тўлиқ равишда бажаришди. Таркибимиздаги асосий 3 нафар футболчимизнинг йўқлигини билдиришмади ва ўз иродаларини намойиш этиб, ғалаба қозонишга муваффақ бўлишди.

Ўринбосарлар таркибидан маҳаллий футболчиларни асосий таркибга жалб этиш борасида тўхталадиган бўлсам, ёшлар жамоамизнинг ўз мураббийи бор – Шуҳрат ака Қорабоев. Биз бу мутахассисга тўлиқ ишонамиз. Шуҳрат ака ёш футболчиларни тарбиялаб, асосий таркибга етказиб бермоқда ва ёшлар таркибидан янги ўйинчилар 2-даврада ва келаси йили секин-аста асосий таркибдан жой олишади, деган умиддаман.

Биз ҳар бир учрашувда рақибга ва ўйиннинг қандай кечишига қараб, таркибда ўзгаришларни амалга оширамиз. Жиззахдаги ўйинда ўзгаришлар ўз самарасини бермаган, аксинча, 14 дақиқа ичида ўз дарвозамиздан 3та тўп олиб чиққандик. Бугунги баҳсда эса ўзгаришлар ўз самарасини берди.

Ҳозирча шу таркиб билан трансфер ойнаси очилгунча ўйнаб турамиз ва у ёғини вақт кўрсатади. Албатта, изланишда ва ишлашда давом этамиз ва сафардаги кучли рақибларга қарши кечадиган баҳсларда ҳам зафар қучиб, мухлисларни хурсанд этишга интиламиз. Остон Ўрунов 17 ёшда ва унинг ёрқин ўйинлари  ҳали олдинда, Худо хоҳласа!

Остон Ўрунов (“Навбаҳор” ярим ҳимоячиси): - Бугунги ўйинда мураббийларимизнинг кўрсатмаларига тўлиқ амал қилган ҳолда, зафар қучиб, мухлисларимизни хурсанд этдик.