Икром Алибоев: "Жанубий Корея лигасида ўйнашдан бахтлиман"

"Жамоага қўшилганимдан жуда ҳам хурсандман. "Сеул" ўз тарихига эга бўлган жамоа. Стадионни кўрдим, менга жуда ҳам ёқди. "Сеул" жамоаси ҳақида кўп маълумотларни билардим. Ўз вақтида бу клуб таркибида Осиёнинг икки карра энг яхши футболчиси бўлган Сервер Жепаров ўйнаган.

"Сеул" Жанубий Кореяда олти марта чемпион бўлгани ва икки бор Осиё чемпионлар лигасида ғолиб бўлганидан хабардорман. Бу жамоа ҳақидаги таассуротларим жуда ҳам илиқ эди.

Августда Жакартада ўтган Осиё ўйинларида Жанубий Кореяга қарши ўйнагандик. Ўша ўйинда биз 3:4 ҳисобида ютқазгандик. Рақиб жуда ҳам шакллангани кўриниб турганди, жисмоний, техник ва тактик томонлама яхши ўйнашди. Биз ҳам уларга муносиб қаршилик кўрсатгандик. Омад улар томонида бўлиб ғалаба қозониб кетишганди.

Умуман олганда Корея футболи Осиёда ўз ўрнига эга. К-лига Осиёнинг энг кучли лигаларидан бири ҳисобланади. Мана шу лигада ўйнашимдан бахтлиман.

Менга майдон марказида ўйнаш ёқади. Ҳужумчилар ортидами ёки таянч ярим ҳимоясидами фарқи йўқ. Марказда ўйнасам бўлгани.

Ўйинимга келадиган бўлсам, қисқа пас, кўпроқ тики-така услубида ўйнаш ёқади.

2019 йилги мавсумда Жанубий Корея чемпионатида энг кўп голли пас берган футболчилар орасида бўлишга ҳаракат қиламан ва насиб қилса бунга эришаман.

"Сеул" клуби мухлисларига кейинги мавсум биргаликда чемпионликни нишонлашни ва ундан кейинги йил Осиё чемпионлар лигасида ғалаба қозонишни тилайман. Барча мухлисларни "Seoul World Cup" стадионида кутиб қоламан ва улар билан кўришишни орзиқиб кутаяпман", - дейди Алибоев "Сеул" клуби матбуот хизматига.