Ҳожимат Эркинов: "Терма жамоада машғулот ўтказиш менга катта тажриба беради"

Кеча миллий жамоамиз Темур Кападзе мураббийлигидаги Ўзбекистон ёшлар терма жамоасига қарши майдонга чиқди ва 3:2 ҳисобида ғалаба қозонди. Ўйиндан сўнг миллий терма жамоага илк бор таклиф этилган Ҳожимат Эркиновнинг фикрлари билан қизиқдик.

"Машғулотлар яхши кетмоқда. Барча футболчилар бор кучи билан ҳаракат қиляпти. Ҳар бир кунги машғулот кўтаринки кайфиятда ўтмоқда десам муболаға бўлмайди. Уйда ўтирган эдим, кеч бўлиб қолганди, ЎФА расмий сайтида терма жамоага чақирилганлар рўйхатида исмимни кўриб қолдим. Миллий жамоадан таклиф олиш ҳар бир футболчининг орзуси ҳисобланади. Албатта, миллий жамоа билан машғулотларда иштирок этиш менга катта тажриба ва малака ошириш имконини беради. Ҳали ёшман, ўрганишим керак. Вадим Абрамов ҳақида фақат ижобий фикр билдиришим мумкин. Яхши инсон ва яхши мураббий",- дейди АГМК футболчиси Ҳожимат Эркинов. 

Абдулазиз Искандаров ёзиб олди.