Ҳелбер: "Ҳар қандай футзалчи жаҳон чемпионатига келиб, гол уравермайди"

"Тўғри, Ангола мағлуб бўлди, чунки Украина бошқача структурага эга жамоа ҳисобланади. Аргентина билан ўйиндан кейин турнирни тарк этишимиз мумкин, лекин ушбу мусобақа биз учун катта тажриба бўлади.

Жаҳон чемпионати биз иштирок этишимиз керак бўлган энг яхши мусобақадир. Ўйлайманки, Ангола янада яхшироқ тайёргарлик билан кейинги мундиалларга қайтади. Олдимизда Аргентинага қарши ўйин бор, унгача тикланишга ва камчиликларни тўғрилашга ҳаракат қиламиз. 

Украина биздан кучли эди ва яхши тайёрланганди, уларни табриклайман. Бу ерда дунёнинг энг яхши футзалчилари жамланган. Уларга қарши ўйнаб, катта тажриба орттириш мумкин.

Жаҳон чемпионатидаги илк иштирокимда илк голимни урдим. Натижадан қониқиш ҳосил қилдим демоқчи эмасман, лекин бу ерда яна шундай голлар уришни истардим. Бу ердаги хотираларни ёдимда абадий сақлайман. Ҳар қандай футзалчи жаҳон чемпионатига келиб, гол уравермайди. Агар мен бу ишни такрорлаш имкониятига эга бўлсам, ўзимни бахтли ҳис қилардим"

Оқил Абдубарноев суҳбатлашди.