"Ҳар йили мураббий ўзгарарди": Погба МЮда ишлари юришмагани сабабларини келтирди

У Англияда дуч келган муаммолари ҳақида гапириб берди.

"Биласизми, жамоада ўйнаб турган вақтингизда мураббий ҳар йили ўзгараверса, бунга мослашиш жуда қийин бўлади.

Буни енгиш қийин ва менда жароҳатлар бор эди, балки булар менинг руҳиятимга таъсир қилгандир.

Шунингдек, турли омиллар бор эди: мураббий, жамоа, майдондаги позициям – буларнинг барчаси менга бироз тўсқинлик қилди.

Бошқа жароҳат олмаслигимга чин дилдан умид қиламан, ўзимни яхши ҳис қиляпман, ўз позициямда ўйнайман ва умид қиламанки, сўнгги бир неча йилдагидан яхшироқ натижага эришаман".

Погба ўтган ой шартномаси муддати тугагач, "Манчестер Юнайтед"ни тарк этганди. У "қизил иблислар"нинг келишувни узайтириш борасидаги бир қанча таклифларини рад этди ва расман "Ювентус"га қайтди.

29 ёшли франциялик футболчи “қизил иблислар” сафида 232 та ўйинда майдонга тушиб, 39 та гол урди ва 51 та голли узатмани амалга оширди. У клубга Европа Лигаси чемпионлиги қўлга киритилишида ва Англия Лига Кубогини ютишда ёрдам берди.