Ҳамиджон Актамов: “Ёшларга ҳам таркибда ўрин беришга ҳаракат қиламиз”

—  Кетма-кет икки мағлубиятдан кейин мухлисларимизга яна ғалаба тақдим этганимиздан хурсандмиз, — дея сўз бошлади Ҳамиджон Ғуломович. — Кейинги учрашувларни юқори савияда ўтказишимиз учун ҳам бугун ғалаба жуда муҳим эди. “Динамо”да янги бош мураббий иш бошлаганлиги, таркибга бир қатор янги футболчиларнинг жалб этилганлиги жамоа ўйинини анча кучайтирганлиги кўриниб турибди.

—  Ҳозирда “Ёшлар” спорт мажмуаси яшил майдони майсаси сифатини яхшилаш  мақсадида кенг кўламда қурилиш-бунёдкорлик ишлари олиб борилмоқда. Шу боис, уй учрашувларини вақтинча “Сўғдиёна” стадионида ўтказяпмиз.

—  Кейинги ўйинда Тошкентда “Пахтакор” жамоаси билан ўйнаймиз. Бу муҳим ўйинга ҳозирдан тайёргарликни бошлаймиз. Чемпионат жадвалида жамоалар  тўплаган очколар ўртасида фарқ у қадар катта эмас. Биргина ғалаба имкониятингизни оширса, аксинча мағлубият жадвалдаги аҳволингизни оғирлаштириб юбориши мумкин. Шу боис, ҳар бир учрашувда фақат ижобий натижа қайд этиш учун майдонга чиқамиз.

—  Аста-секин ёшларга ҳам таркибда ўрин беришга ҳаракат қиламиз. Бугун ярим ҳимоячи Бобуржон Искандаров ўзининг фаоллиги билан бошқалардан ажралиб турди.У захирадан ўйинга қўшилган бўлса-да, ўзини йўқотиб қўймади. Аксинча, қисқа вақтда жамоадошлари билан тил топишиб кетганлигини барчангиз кўрдингиз. Искандаровга ўхшаган ўйинчилар жамоамизда талайгина.