Гвардиола ёзда кетадими? Романо жавоб берди

Унинг сўзларига кўра, бундай сценарий эҳтимоли бор, аммо ҳозирча якуний қарор қабул қилинмаган.

Аввалроқ Британия ОАВ испаниялик мутахассис ёзда жамоани тарк этиши мумкинлиги ҳақида хабар тарқатган эди. Романонинг таъкидлашича, вазият ичида бўлган айрим инсонларда шундай кутилмалар бор, аммо ҳозирча гап фақат тахминлар ҳақида кетмоқда.

"Менинг маълумотларимга кўра, Гвардиоланинг мавсум охирида "Манчестер Сити"ни тарк этиш эҳтимоли бор. Буни ушбу жараёнга жалб этилган одамлар ҳам шундай баҳоламоқда. Аммо қарор ҳали қабул қилинмаган. Ҳеч қандай расмий баёнот йўқ. Ҳозир эндигина февраль, шунинг учун кафолатлар ҳақида гапиришга эрта", – деди Романо.

Инсайдернинг қўшимча қилишича, кўп нарса мавсум якунига, айниқса, АПЛ ва Чемпионлар Лигасидаги натижаларга боғлиқ бўлади. Унинг фикрича, айнан натижалар Гвардиоланинг қарорига таъсир кўрсатиши мумкин.

Шунингдек, "Манчестер Сити" эҳтимолий ўзгаришларга тайёргарлик сифатида мураббийлар бозорини таҳлил қилаётгани ва эҳтимолий номзодларни кўриб чиқаётгани хабар қилинмоқда.

Гвардиола "Сити"ни 2016 йилдан бери бошқариб келмоқда. Бу вақт мобайнида жамоа Англияда бир қатор совринларни, жумладан бир нечта Премьер-лига чемпионлигини, Англия Кубогини ҳамда Чемпионлар Лигасини қўлга киритган.