Ғолиб номи "лоторея" орқали аниқланса чакки бўлмасди...

Бугун эрта тонгда "Афросиёб" поезди билан Самарқанд шаҳрига йўлга отландим. Тошкентдан 07:00да қўзғалган поезд соат 09:09да Самарқанд вокзалига етиб келди. Финал олдидан ташкил этилган матбуот анжумани 10:30 белгиланганди. Шу боис вокзалдан тўғри "Динамо" стадионига қараб йўлга тушдим. Йўл-йўлакай таксичи амаки билан гурунг қизиди. Сабаби, амаки футболга жуда қизиқарканлар ва табиийки ўзбек футболидан гап очиб қолдилар.

Ўзбекистон терма жамоаси Жанубий Кореяда омади чопмагани ва ўйиндан кейин уйларидан беш кунча чиқмаганликларини сўзлаб бердилар. Футболда омад жуда муҳим ва керакли нарса деб алоҳида қўшимча қилдилар. Финал гарчи ноқулай вақтда бошланаётганига қарамасдан ўйинга тушишларини таъкидладилар. Кимга мухлислик қиласиз, деган саволимга эса: "Албатта "Локомотив"гада!", дея жавоб бердилар. Ўтган йилги финалда жиззахлик кўпчилик ишқибозлар "Насаф"ни қўллаганди. Эртага эса Самарқанд аҳолисининг бир қисми "Локомотив"ни қўллаб-қувватлаши кутилмоқда.

Матбуот анжуманида дастлаб "Насаф" бош мураббийи Рўзиқул Бердиев ва дарвозабон Элдорбек Суюнов иштирок этишди. Тўғриси, финалдан олдин ташкил этилган матбуот анжуманида маҳаллий журналистлардан фақатгина иккита ОАВ ходими келгани одамни ажаблантирди. Қолгани эса ПФЛ матбуот хизмати ва иккита клуб матбуот хизмати вакиллари эди. Рўзиқул Бердиев ўз сўзида Ўзбекистон кубогини ўзларида сақлаб қолишни истаётганликларини ва "Насаф" ҳар қандай рақиб билан ўйнай олишини исботлаганини таъкидлади. Шунингдек, "Насаф" ҳеч бир футболчига боғланиб қолмагани ва жамоада 20га яқин футболчи борлигига алоҳида урғу берилди. Бердиевнинг айтишича, финалга уларнинг ўйлаб қўйган ўз режаси бор.

Анжуманнинг иккинчи қисмида Андрей Микляев билан Олег Зотеев қатнашишди. Улар кубокни Самарқанддан Тошкентга олиб қайтиш учунгина келишганини яширишмади. Микляев "Локо" пенальтилар сериясига тайёргарлик кўрмаганликларини ва буни атайин қилишганини айтиб ўтди. Улар ишни "лоторея"га қадар чўзишмоқчи эмас. Микляев ва Зотеев журналистлар саволларига анча тетик ва аниқлик билан жавоб беришди. Ўзбекистон чемпионатининг амалдаги чемпиони юқори ишонч билан гапираётганликларини сезиш қийин эмасди.

"Локомотив" ва "Насаф" жамоалари шундан кейин навбати билан финал олдидан расмий машғулотни ўтказишди. Унга қадар стадион маъмурияти майдонни қордан тозалаш ишларини якунлаганди. "Локомотив" футболчиларидан Неманья Яничич ва Бобур Йўлдошев якка тартибда шуғулланишди. Бу икки ҳимоячи бутун машғулотни енгил югуриш билан ўтказишди. "Насаф"да эса барча футболчилар умумий гуруҳ билан тўлиқ машғулотларда қатнашди.

Ҳа айтганча, Самарқанд шаҳри финалга яхши даражада тайёргарлик кўрган. Стадион атрофида янги реклама шитлари қилинган. Шунингдек, ўйиндан кейин тақдирлаш маросими учун янги подиумлар ясатилган. Стадион кассаларида чипталар сотилиши давом этаётганди. Ўйинга бўлган қизиқиш яхши. Эртага аншлаг бўлиши ҳақида ҳозирча аниқ бир фикр билдириш қийин. Қаршидан ҳам кўп минглаб ишқибозлар эртага Самарқандга ташриф буюришлари аниқ. Стадион ўз бағрига 13800 ишқибозни сиғдира олади. Тахминан эртага стадионнинг 70% мухлислар билан тўлиши деярли аниқ. Балки ҳаво яхши бўлса трибуналарда бўш ўриндиқлар қолмаслиги ҳам мумкин. Шундай бўлгани дуруст албатта.

Жорий мавсумда "Насаф" чемпионатдаги иккала ўйинда ҳам "Локомотив"га имкониятни бой берди. Бу клуб тарихида илк маротаба юз бериши. "Локомотив" финал олдидан "Насаф"га қараганда жисмоний тарафлама анча толиққан. Жамоа Ўзбекистон чемпионати, Ўзбекистон кубоги ва ОЧЛда анча куч йўқотди. Камига "Бунёдкор"га қарши ярим финал ўйинларини "темирйўлчилар" анча кеч ўтказишди. Финалда "Локомотив"га Сервер Жепаров кўмаклаша олмайди. "Насаф"да эса Илҳом Шомуродов ва Дилшод Раҳматуллаевдан ташқари барча сафда. Бу икки футболчи жароҳат олганига анча кўп муддат бўлди ва "Насаф" иккинчи даврани уларсиз муваффақиятли ўтказди. Шу боисдан бу йўқотишлар "Насаф"га муаммо туғдирмаса ҳам керак. Камига Рўзиқул Бердиев йўқотишлар ҳақида гапираркан, бу икки футболчи ҳақида эслагани ҳам йўқ ва барча футболчилар тўлиқ сафда эканлигини таъкидлади.

Финалда ҳар доим иккала жамоаларнинг имкониятлари тенг бўлиб келган. "Локомотив"нинг устунлик жиҳати бу футболчиларнинг катта тажрибаси, маҳорати. Мирко Йеличичи тактик тарафлама ҳам анча ақлли ва айёр мураббий эканлигини ушбу мавсумда ички чемпионатда кўп маротаба исботлади. "Насаф"нинг устунлик томони шундаки, бу биринчидан рақиб жисмоний тарафлама анча толиққан. Шунингдек, "Насаф" эртанги ўйинда катта эҳтимол билан 12-футболчилари, яъни мухлисларига таяниши мумкин. Аниқроғи, Самарқандда ҳам "Насаф" ўзини ўтган йили Жиззахда бўлгани каби мезбондек ҳис этиши мумкин. Бердиев айтиб ўтган режа қандай эканлигини эртанги баҳсда кўрамиз. Ҳозирча ушбу режа катта эҳтимол билан "автобус" орқали амалга ошиши мумкинлигини тахмин қила оламан.

Нима бўлган тақдирда ҳам эртага қайсидир жамоа ўз тарихидаги иккинчи кубокни ўзи билан уйига олиб кетади.

Финалда пенальтилар серияси кўришни ва ғолиб номи айнан "лоторея" орқали аниқланишини истайдиган кўплаб ишқибозлар топилишига ишонаман.

Эртага ўйин шу сценарий остида ўтса чакки бўлмасди, а?

Шаҳбоз Беғамов