Гай билан Касьян “Андижон”ни тарк этди

Битта ғалаба ва битта дурангдан ташқари “бургутлар” қолган 7 ўйинда рақибларига имкониятни бой берди. Бу эса жамоани турнир жадвалида пастки ўринларга “жйолаб” қўйди. Яқинда “Насаф”ни қабул қилган андижонликлар 1:0 ҳисобида имкониятни бой берди. Шундан сўнг клубда йўқотишлар кузатилди.

Гап шундаки, йил бошида мураббийлар штабида иш бошлаган Роберт Гай ўз аризасига биноан “Андижон”ни тарк этди. Афтидан Роберт Сергеевич яна биринчи лига вакили “Чуст-Пахтакор”га қайтадиган кўринади. Чунки чустликларнинг бу йилги қайд этаётган натижаси яхши эмас, шу боис раҳбарият яна бошқарув постига Гайни таклиф этишни кўзлаётган бўлса ажаб эмас.

“Андижон”ни мураббийдан ташқари легионер футболчи Алексей Касьян ҳам тарк этди. Молдовиялик футболчи жорий мавсум бир нечта ўйинларда жамоадошларини майдонга сардор сифатида бошлаб тушганди. Лекин у охирги пайтларда ўзидан кутилган ўйинни намойиш эта олмаган кўринади. Шу сабабли футболчи ватанига қайтган.
Эслатиб ўтамиз, бундан олдин Абдураимов ҳужумчи Виктор Расков билан ҳам хайрлашишга қарор қилганди.

Айтишларича, биринчи даврадан сўнг жамоада жиддий ўзгаришлар бўлиши кутилмоқда.