Футзал. Шуҳрат Тожибоев: "Гуруҳда биринчи бўлишимизни кутмагандим"

Бу босқичда Ўзбекистон терма жамоаси Ливанга қарши баҳс олиб боради. Ўйин Тошкент вақти билан 16:30 да бошланади. Ана шу учрашувдан олдин терма жамоамиз сардори Шуҳрат Тожибоевдан интервью олдик.

- Япония билан ўйин ҳақида таассуротларингиз?
- Япония амалдаги Осиё чемпиони, жуда яхши шаклланган жамоа. Ўйин ҳам шунга мос равишда жуда шиддатли ўтди. Йигитларда шижоат кучли эди ва шунинг учун ҳам сўнгги сонияларгача курашдик. Шунинг учун ҳам ғалаба биз томонда бўлди.

- Осиё чемпионатидан олдин гуруҳда биринчи бўлишимизни кутганмидингиз?
- Тўғрисини айтсам, Япония борлигини инобатга олиб гуруҳда биринчи ўринни олишимизни кутмагандим.

- Вьетнамдаги мусобақанинг ташкилий томонларига қай даражада баҳо берасиз? Футзалчиларга яратиб берилган шароитлардан келиб чиқиб?
- Мусобақанинг ташкилий томонига яхши баҳо берган бўлардим. Яратиб берилган шароитлар ҳам жойида.

- Терма жамоага таклиф этилган ёш ўйинчилар ҳақида фикрингиз?
- Ёшлар Осиё чемпионатида терма жамоага яхши киришиб кетишди. Энг муҳими, ўйин пайтида ўзларини йўқотиб қўйишмаяпти ва терма жамоага фойдаси тегмоқда.

- Вьетнамда сизлардан қўллаб турган муҳлислар қанчалик куч бағишламоқда?
- Бу ерга келган муҳлислар бизга жуда катта куч бағишламоқда. Муҳлисларимизга бошчилик қилаётган Абдурахмонга ҳам рахмат, ҳар ўйинимизда бизга ана шундай муҳлислик қилиб туришса, ғалаба фақат биз томонда бўлади деб умид қиламан.