Футбол бўйича "Олий суд раиси кубоги-2022” мусобақалари ўтказилади

Буни жойларда корхона ва ташкилотлар ўртасида ташкил этилаётган мусобақалар мисолида ҳам кўриш мумкин. 

Аҳолининг жисмоний чиниқиши, соғлом турмуш тарзига йўналтиришда Ўзбекистон Республикаси Президентининг 2018 йил 18 декабрдаги “Юқумли бўлмаган касалликлар профилактикаси, соғлом турмуш тарзини қўллаб-қувватлаш ва аҳолининг жисмоий фаоллиги даражасини ошириш чора-тадбирлари тўғрисида”ги Қарори, 2020 йил 30 октябрдаги “Соғлом турмуш тарзини кенг тадбиқ этиш ва оммавий спортни янада ривожлантириш чора-тадбирлари тўғрисида”ги Фармони ҳамда 2021 йил 16 июндаги “Аҳолининг жисмоний тайёргарлик даражасини баҳолаш  тизимини жорий этишнинг ташкилий чора-тадбирлари тўғрисида”ги Қарори муҳим аҳамият касб этмоқда. 

Олий суд раисининг 2022 йил 25 апрелдаги буйруғи қабул қилиниб, унда Олий суд тизимида соғлом турмуш тарзини кенг тадбиқ этиш ва оммавий спортни янада ривожлантириш мақсадида 5-8 май кунлари футбол бўйича “Олий суд раиси кубоги-2022" мусобақаси ўтказилиши белгиланди.  

Ушбу мусобақа республика судлари тизими миқёсида илк маротаба ўтказилаётгани билан аҳамиятлидир. 

Мусобақада Олий суд, Қорақалпоғистон Республикаси, вилоятлар ва Тошкент шаҳар судлари, Қорақалпоғистон Республикаси, вилоятлар ва Тошкент шаҳар маъмурий судларидан ҳудуд бўйича биттадан бирлашган терма жамоалари ҳамда Ўзбекистон Республикаси Ҳарбий суди терма жамоаси иштирок этади. 

Куни кеча Олий судда мусобақа олдидан қуръа ташлаш маросими бўлиб ўтди. Унинг шаффоф ўтиши учун Ўзбекистон Футбол ассоцацияси мутахассислари таклиф этилди. Қуръа ташлаш натижаларига кўра, жамоалар тўртта гуруҳда 16 та жамоа таркибида ўзаро тўп суради. Ғолиб жамоалар ярим финал ва финал мусобақаларида майдонга тушади. Биринчи тур, чорак тур, ярим финал мусобақалари 5-7 май кунлари “Бунёдкор” стадиони майдонларида, финал ўйини эса 8 май куни “Чиғатой” стадионида бўлиб ўтади. 

Финалда ғолиб бўлган жамоага Олий суд раиси кубоги, медаллар, диплом ва қимматбаҳо совғалар топширилади.