Франция сўнгги беш ўйиннинг тўрттасида Швейцарияни таслим эта олмаган! Ўзаро ўйинлар тарихи

Франция ва Швейцария ўзаро 38 марта тўқнаш келишган бўлиб, уларнинг 16 тасида французлар устун келишган, 12 тасида Швейцарининг қўли баланд келган, яна 10 учрашувда эса дуранг қайд этилган. Тўплар нисбати — 67:60, французлар фойдасига.

Ушбу жамоалар ўртасидаги биринчи ўйин 1905 йилда бўлиб ўтган. Энг қизиғи шундаки, йигирманчи асрда кўплаб ўртоқлик ўйинларини ўтказган ушбу жамоалар ҳеч қачон расмий мусобақаларда тўқнаш келмаган. 

Бу анъана Евро-2004'га қадар давом этди.

Ўша турнирда Анрининг дубли ва Зиданнинг голи "уч ранглилар"га ғалаба келтирди 3:1. Франция гуруҳда биринчи ўринни эгаллайди, Швейцария эса сўнгги ўринда қолиб кетади.

Ўшандан бери жамоалар яна беш учрашув ўтказишди, шулардан тўрттаси дуранг билан якунланган, жумладан, Евро-2016'да 0:0 ҳисоби қайд этилган. Ушбу сегментдаги французларнинг ягона ғалабаси бундан етти йил илгари Бразилия яшил майдонларидаги мундиалда содир бўлган. Ўшанда французлар рақибларини аяб ўтирмаган — 5:2. Айтганча, ўша пайтдаги француз таркибининг деярли ярми ҳамон сақланиб турибди.

Французлар гарчи гуруҳ босқичида кучли жамоаларга қарши майдонга тушган бўлса ҳам, мухлислар кутган ўйинни намойиш эта олмади. Бир ғалаба ва икки дуранг натижа қайд эта олган жамоа ўз кучини плей-оффга асраб қўйган бўлиши мумкин. Швейцария гигант жамоа саналмаса ҳам французлар учун қулай рақиб эмас. Буни юқоридаги статистика тасдиқлаши мумкин. Хўш, бугунги оқшомда "учранглилар" ўз юришини давом эттирадими ёки Шакири бошчилигидаги жамоа мундиал эгаларига совға тайёрлаб қўйишганми, буни биргаликда гувоҳи бўламиз.