Финал олдидан. Феликс Санчес: "Агар чемпион бўлсак, бу Қатар футболи тарихидаги энг катта ютуқ бўлади"

Бугун ўйиндан олдинги матбуот анжумани ташкил этилди. Унда иштирок этган Қатар терма жамоаси бош мураббийи Феликс Санчес қуйидаги фикрларни билдирди:

"Эртага Қатар футболи тарихидаги энг муҳим ўйин бўлади. Ниҳоят катта сакрашни амалга ошириб, финалга қадар етиб келдик. Жамоам бўлажак баҳсга руҳий жиҳатдан тайёр. Агар биз ғалаба қозонсак, бу Қатар футболи тарихидаги энг катта ютуқ бўлади".

"Биз яна бир чиройли учрашувни ўтказишни мўлжаллаб турибмиз. Ижобий натижа қайд этиш учун бутун жамоа тер тўкиб меҳнат қилди. Биз финалда ғалабага эришиб, қатарлик мухлисларни хурсанд қилишни хоҳлаймиз".

"Бу ерга келганимизда чемпионлик вазифасини қўймагандик, балки ҳар бир учрашувда ўзимизни кўрсатишни мақсад қилгандик. Биз ҳар қандай жамоага қарши муносиб ўйнай оладиган жамоа тузишга ҳаракат қиляпмиз. Яқин келажакда Осиёнинг энг кучли жамоаларидан бири бўлишни истаймиз".

"Ҳозирча бу мусобақада олтита ўйин ўтказдик ва ҳар бири алоҳида ҳикояга эга. Гуруҳ баҳсларида босимга дуч келдик, плей-оффда эса босим янада катталашиб борди. Японияга қарши баҳс биз учун алоҳида мақомга эга бўлади. Япония Осиё Кубогини бир неча бор ютган. Лекин бу жамоанинг ҳам камчиликлари бор ва эртага шундан фойдаланишга ҳаракат қиламиз".