FIFA.UZ: Англия премьер-лигасида қайси футболчини олиш тавсия этилади? (2-қисм)

Кеча ушбу мақоланинг илк қисмини тақдим этгандик. Навбат қолган 10та клубга етиб келди.

«Манчестер Юнайтед»
Оламиз. Жаҳон чемпионати тугаб бўлди ва Руни (100) ажойиб ўйнашни бошлади ва голлар урмоқда. Мавсумолди ўйинларда кетма-кет голлар урган футболчи ван Перси, Старриж ва Агуэродан арзон туради. Рунидан ташқари Мата (90), Андер (80), Шоу (65) ва ван Перси (110) кабилар бор.

Шошилмаймиз. Ван Гал 3та ҳимоячи билан ўйнашни яхши кўради. Марказда Эванс (60) ва Жонс (70) ўйнаши мумкин, аммо барча Хуммельсни кутмоқда.

Олиш шарт эмас. МЮ сафида олиш керак бўлмаган футболчилар бир талай: Нани, Янг, Феллайни, Чичарито, Клеверли, Андерсон, Заа — бу футболчиларнинг кўпчилиги клубдан кетиб қолиши ҳам мумкин.



«Ньюкасл»
Олиш керак. «Ньюкасл» сафида Сим Де Йонг (75) ва Кабелла (75) каби футболчилар бор. «Кабелла «Сент-Жеймс Парк»да ўзининг қобилияти, энергияси ва голларини барчага намойиш этади», – дейди Алан Пардью. Ўтган мавсум у «Монпелье» сафида 14та гол урди ва 5та голли пас оширди.
 
Ёзда жамоага Янмат (65) келди ва энди Дебюшининг ўрнини эгаллайди. Колоччини билан бирга Янга-Мбива (50) ёки Стивен Тейлордан (55) бири ўйнайди. Колоччинини (65) ўзини ҳам олиш мумкин, фақат ўз юртини соғиниб қолмаса бўлди.

Олиш ярамайди.  Тиоте яхши ўйинчи (6.0) аммо ўтган йил биронта гол ура олмаган ва 10 бор огоҳлантирилган футболчини нима қиласиз? Ҳужумчи Паписс Сиссе (80) 2та гол ва 2та пас оширганидан уялиши керак.

«Сандерленд»
Оламизми? Адам Жонсон (85) ўйнаб кета олса дарҳол олинг. Ўтган мавсумда 5та ўйинда (6+2) натижа қайд этганини унутманг.

Дарвозабон Вито Манноне (70) ўтган мавсум фентези футболда энг фойдали футболчилардан бири бўлганди, Сандерлендга Костел Пантилимоннинг (55) келиши бироз ўйга толдиради. «Сандерленд» сафида бу йил ҳам дарвозабон энг кўп очко олиши мумкин.

50 эвазига «Челси»дан ижарага олинган ванн Анхолтни олиш мумкин . У ҳужумга кўп бор қўшилиб туради.

Ўтган мавсум сўнггида голлар уриб ташлаган Коннор Уикхэмга ҳамон ишонсангиз (65) уни олинг. Агар қўрқсангиз Жози Алтидорга қаранг 75 туради, шунда қўрқув йўқолади.
Келинг олмайлик. Алтидорни олиш шарт эмас: ўтган йил 31та ўйинда 1та гол урган ҳужумчини олиб очко олмоқчи бўлсангиз марҳамат. Умуман ушбу клуб ҳужумчиларига у қадар ҳам ишонмайман.

«Саутгемптон»
Тезроқ оламиз. Ўтган йилги юлдузлардан ҳозирча Шнайдерлин (80) ва Родригесни (90)олиб кетишмади. Аммо биринчи футболчи ўтган йил у қадар ўзини кўрсата олмаганди (2+1), иккинчиси эса ҳали узоқ даволанади.

Сербиялик Тадичга (80) эътибор қилинг. Ўтган йил Голландия чемпионатиининг 33та ўйинида майдонга тушган футболчи «Твенте»нинг 30та голида иштирок этди (16+14). У янги Лаллана бўлиши мумкин.

Жамоанинг яна бир янги ҳужумчиси Грациано Пелле (80) Голландия чемпионатида 23та гол урди. Нархи ўртача, сотиб олиш ва икки тур кузатиш мумкин. «Саутгемптон» кам гол ўтказса Натаниэл Клайн (65) яхши харид бўлади.

Олмаймиз. Қиммат ҳужумчи Пабло Освальдо (75) бошқа клубга кетишга яқин, кетаверсин майли.



«Сток»
Оламизми? Питер Одемвинги (80) энди ярим ҳимоячига айланди, олиш керак. Арнаутович (75) билан бирга олиш ҳам мумкин. Агар Чарли Адам (80) мураббий Хьюзга асосий футболчи эканлигини исботлай олган бўлса 85 эвазига ҳам олиш мумкин.

Шоукросс ва Хут (60) каби футболчиларни олмаслик тўғри иш бўлмайди.

Олмаймиз! Йиллар ўтмоқда, Питер Крауч (85) жуда кам гол урмоқда. Шу боис гол урмайдиган қиммат ҳужумчини таркибимизга қўшиб ҳеч қандай барака топмаймиз.

Стив Сидуэлл (80) «Фулхэм»да анча самарали ўйнаб кетди, аммо «Сток»да марказда Нзонзи, Уэлан, Паласиос, Адам ва Айрленд билан рақобатлашиши керак.

«Суонси»
Кимни оламиз? Мичу, Ворм ва Бен Дэвис кетганидан сўнг ушбу клубда фэнтези футбол учун ўйинчилар анча камайди. Аммо умуман йўқ эмас. Вилфрид Бони (90) агар 1 сентябрга қадар жамоада қоладиган бўлса яна жамоа тўпурари бўлиши мумкин. Ўтган йил Бонита 16 гол урганди, кейинги ўриндаги футболчи эса 6 марта тўп киритган.

«Либерти»га қайтган Гилфи Сигурдссонни (70) ўйлаб ўтирмай сотиб олинг. «Тоттенхэм»да ўзини кўрсата олмаган бўлса ҳам  «Суонси» сафида ярим мавсум ичида 7 бор гол урганди.

Дарвозабон Фабиански (65) асосий футболчи бўлади. Унинг нархи ҳам арзон, баъзида пенальтини қайтаришни ҳуш кўради.

Ким керак эмас. Таянч ярим ҳимоячиларни ўтказиб юборамиз. Масалан, Хосе Каньяс (65) бизга умуман керак эмас, у «Суонси» сафида 5 йил ичида, «Бетис» сафида ҳам умуман гол ура олмаган. Бу 100 тадан кўп ўйин деганидир. Бафетимби Гомисни (80) дарҳол сотиб олманг, сабаби сиз ҳали унинг исмини ҳам тўғри талаффуз қила олмайсизку.

«Тоттенхэм»
Оламиз. «Тоттенхэм» ва Почеттинони қизиқарли мавсум кутиб турибди. Жамоанинг янги мавсумдаги юлдузи Кристиан Эриксен (85) бўлиши мумкин. Ўтган йил у Англияда 23та ўйинда 7+8 натижа қайд эди. Бу йил эса қандайдир 37та ўйинда 12+15 натижасига эришиши мумкин.

Паулиньо биринчи мавсумида (6+2) ёмон натижа қайд этмаганди. Адебайор (85) эса барча мураббийлар билан ҳам яхши чиқишавермайди, шу боис унинг Почеттино билан алоқаси қандай бўлишини кутинг.

Льорис (75) кучли ва қиммат посбон, аммо асосий таркибда ўйнаши деярли аниқ.

Олмаймиз. Роберто Сольдадо учун 85 тўлаш аҳмоқлик. Мусса Дембеле (75) асосий таркибга кира олиши мумкин, аммо ҳужумчи мавсум давомида биттадан кўп гол уришига ишониш қийин. Ламела (80), Холтби (75), Шадли (70) каби футболчиларни мураббий қай тариқа ишлатишини ҳозирач билмаймиз.

«Халл»
Эҳтиёткорлик билан олинг, ёки умуман олманг. «Халл» ўтган мавсумдаги ажойиб натижалардан сўнг пасайиш кузатилиши мумкин. Айниқса агар жамоа Европа лигаси гуруҳ босқичига чиқса. Ўтган йил жамоа сафида ҳеч ким 4та гол урмаган ва 4 та голли пас оширмаган. Лонг (80) ва Елавич (75) каби футболчилар атига ярим мавсум ўйнашди, аммо 4та голни баъзи футболчилар яримта ўйинда уриб ташлашади.

«Халл»га келган Роберт Снодграсснинг (80) статистикаси яхши, ўйлаб кўришиниз мумкин. Арзон ҳимоячилар Честер (55) ёки Брюсни (55) захирага олса бўлади.



«Челси»
Олиш шарт! Диего Коста (95) — ушбу футболчи «Челси» чемпион бўлиши учун етишмаган бўлиши мумкин. Бундай ярим ҳимоячилар билан Коста мавсум давомида 20тадан ортиқ гол уриши керак. «Барселона»дан келган Фабрегас (95) қиммат лекин фойдали ўйинчи.
 
Янгиларни олишни бошладикми давом этамиз: Луис Фелипе (65) асосий таркибда ўйнайдиган энг арзон ҳимоячи. «Челси» кам гол ўтказади, Гари Кэйхилл (75) ортиқчалик қилмаса керак. Энди асосий посбон Куртуа (75) бўлади шекилли: аммо Петр Чехнинг фикри бошқача, Чехнинг фикрини ҳурмат қилинг.

Шошилманг. Азар (100) ва Оскарни (95) олишга шошилманг. Ўтган мавсум сўнггида Эден Моуриньо томонидан танқид остига олинди ва ЖЧда ҳам ёрқин ўйнай олмади. Иккинчи футболчи эса Фабрегас, Виллиан, Шюррле ва Салоҳ билан асосий таркиб учун курашади.

Дидье Дрогба 36 ёшли футболчининг нархи (90) қиммат, фэнтези футболда номлар асосий ролни ўйнамайди. Неманья Матич (80) — майдонда фойдали, аммо бизнинг ўйинимизда эмас. Торресни (75) эсдан чиқармадингизми? Эсдан чиқараверинг.

«Эвертон»
Агар пулингиз қолган бўлса оламиз. «Эвертон» сафида Ромелу Лукаку (80), Лейтон Бейнс (75) каби фэнтези юлдузлари бор. Бейнс жарима тўпларидан голлар уришни тўхтатмаяпти. Ҳимочи тўпурар Коулмэн (65) ва ажойиб дарвозабон Ховард (70), Англия термасининг бўлажак юлдузи Баркли (85) ва Миральяс (90) учун анча кўп харажат қиласиз.

Пул бор бўлса ҳам олманг. Гарет Бэрри (65) 33 ёшга тўлди дея олмаймиз. Премьер-лигада у 90-йиллардан буён ўйнаб келмоқда. Ўтган мавсум у 10 марта сариқ олди ва кам гол урмоқда. Нейсмит асосий бўлмаган футболчи 75 туради.

Умуман олганда булар фақат маслаҳатлар, шу боис ўзингиз ҳам обдон ўйлаб кўришни унутманг.


FIFA.UZда жамоа тузишга ўтиш.