Фарҳод Тожиев: “Олмалиқ” жамоаси билан оғзаки келишувга эришдим"

- Бугунги ўйин ҳақида қандай фикрдасиз?
- Фарғонанинг “Нефтчи” жамоаси жуда кучли шунинг учун жамоадошларим билан жиддий тайёргарлик кўргандик. Айни дамда барча жамоалар сингари бизда ҳам йиғин ўтказиляпти, барча футболчилар юклама билан ўйин ўтказяпти. Ўйлашимча бугунги ўйин барча учун қониқарли бўлди, ғалабага эришганимиз унданда яхши бўлди. Бугунги ўйиндан хулосамиз, футболчиларнинг ҳолати яхши. Менга ҳам қийин жароҳатдан сўнг энди керакли спорт формамга тушяпман. Мен қўллаб – қувватлаб туришгани учун жамоадошларимга раҳмат айтаман.

- Тайёргарлик жараёнида нималарга кўпроқ эътибор қаратяпсизлар?
- Ҳозирги кунда жисмоний тайёргарликка кўпроқ эътибор қаратяпмиз, сабаби олдинги спорт формамизни тиклаб олиш. Кунига икки маҳал машғулот ўтказяпмиз, эрталаб жисмоний машғулот бўлса кечки пайт тўплар билан ишлаяпмиз. Иложи борича барча нарсаларга эътибор қаратиляпти.

-  Биламизки сиз Малайзия чемпионатида тўп тепиб қайтдингиз. Ўзбек футболи билан Малайзия футболи ўртасида қанчалик фарқ бор?
-  Малайзия футболининг чемпионати унчалик кучли эмас, бизнинг футбол билан деярли бир хил деса ҳам бўлади. Сабаби у ерда ҳам кучли легионерлар тўп тепади. Бошқа давлатлар чемпионатига борсангиз ўзингизни синайсиз. Чунки биз чет элда легионер сифатида тўп тепиб келдик. Легионер бўлсангиз сизга нисбатан бошқача кўз билан қарашади, сабаби легионер маҳаллий футболчилардан бир бош баланд бўлиши керак. Ўзимизни кўрсатиш учун қўлимиздан келганча ҳаракат қилдик. Ўзбекистон чемпионатидан қолишмайди, у ерда об – ҳавоси жуда оғир. Ҳамма осон деб ўйлайди лекин бошқа чемпионатда футбол ўйнашнинг ўзига яраша қийинчиликлари бор. Легионар бўлганингиздан кегин  машғулотларда ҳам қолган футболчиларга нисбатан икки баравар кўп тер тўкишингиз керак.

- Малайзия чемпионати сизни қониқтирдими?
- Малайзия чемпионати жуда ҳам қизиқ, сабаби Ўзбенкистон чемпионатида “Локомотив”, “Пахтакор”, “Бунёдкор” жамоалари бошқа жамоаларга қарши ўйнаганда бу жамоалар бемалол ғалаба қозонади. У ерда эса умуман бошқача, сўнгги поғонадаги жамоа, чемпионатда пешқадамлик қилаётган жамоани ҳам енгиши мумкин. Бир сўз билан айтганда чемпионат менга ёқди.

- Клубданми ёки бошқа жамоаларданми сизга бошқа таклиф бўлмадими?   
- Таклифлар бор лекин мен ҳозирги ҳолатимда у ерда яна тўп тепишга тайёр эмасман, чунки катта жароҳат олганимдан сўнг секин аста ўзимга келяпман. Лекин таклифлар йўқ эмас.

- “Олмалиқ” жамоаси билан келишувга эришдингизми?
- Клуб билан ҳозирча шартнома имзоламадим, лекин раҳбарият билан оғзаки келишувга эришганман.
   

Жаҳонгир Сотволдиев суҳбатлашди.