Европа лигаси. Бугун "Хайдук" ва "Краснодар"нинг рақиблари маълум бўлади

Шавкат Саломов ва Камолиддин Мурзоев тўп тепаётган Қозоғистоннинг «Шахтёр» клуби Арманистоннинг «Широқ» клубини қабул қилади. Дастлабки ўйинда «Шахтёр»сафардан 2:1 ҳисобидаги ғалаба билан қайтганди.

Финландиянинг «Хонка Эспоо» ва Эстониянинг «Силамяэ Калев» жуфтлиги ғолиби иккинчи босқичда Россиянинг «Краснодар» клубига қарши ўйнайди. Бу жамоалар ўртасидаги илк учрашувда Эстония клуби ўз уйида 2:1 ҳисобида зафар қучганди. «Краснодар» сафида ўзбекистонлик Одил Аҳмедов тўп тепаётганидан хабарингиз бор.

Люксембургнинг «Женесс» ва Ирландиянинг «Дандолк» клублари ичида ким кучли бўлса кейинги босқчичда Темурхўжа Абдухолиқов фаолият олиб бораётган Хорватиянинг «Хайдук» клуби билан ўйнайди. Илк учрашувда «Дандолк» сафарда 2:0 ҳисобида ғалаба қозонганди.

Иккинчи босқич ўйинлари 17 ва 24 июль кунларига белгиланган.

Эслатиб ўтамиз, Европа Лигасининг ҳал қилувчи финал учрашуви 2015 йилнинг 27 май куни Польша пойтахти Варшава шаҳридаги “Миллий” стадионида бўлиб ўтади.