Европа Чемпионлар Лигаси: Эртага иккинчи тур ўйинлари бошланади

"Барселона" - "Байер", сешанба

Қийин аҳволда қолган "Барселона"

Каталонияликлар ушбу мавсумда 9 та ўйиндан 3 тасида ўз дарвозаларидан 4 тадан гол олиб чиқишди ва бор йўғи 2 та ўйинда ўз дарвозалари даҳлсизлигини сақлаб қолдилар. Умумий ҳисобда "Барса" 17 та гол ўтказиб юборди. "Биз ҳимоядаги ўйинни муҳокама қилдик бироқ, бунинг фойдаси бўлгани йўқ. Бу борада яна иш олиб боришимиз керак", деганди Луис Энрике мавсум бошланишидан олдин. Лекин, кўриб турганингиздек аҳвол ўша-ўша. Бир томонда эса Месси жароҳат олиб, икки ойга сафдан чиққан...

"Ювентус" - "Севилья", чоршанба

Ўзига кела олмаётган "Ювентус"

Ўтган йилги иккинчи финалчининг аҳволига ҳам ҳавас қилиб бўлмайди. Италиянинг амалдаги чемпионлари А Сериядаги 5 та ўйиндан сўнг бор йўғи 5 очко жамғара олганлар. Бир томондан "Манчестер Сити" устидан қозонилган ғалаба барчаси жойида эканлигини кўрсатиши мумкин. Лекин, бу турда туринликларга осон бўлмайди, рақиб - "Севилья".



"Порту" - "Челси", сешанба

Моуриньо "Порту"га қайтмоқда

"Порту"да машҳурликка эришган Жозе Моуриньо собиқ жамоасига меҳмон бўлиб боради. 2004/05 йилда "Челси" бош мураббийи сифатида "Драгао"га ташриф буюрган Жозе ўшанда 1:2 ҳисобида мағлуб бўлганди.

Касильяс рекордга яқин

"Порту" шарафини ҳимоя қилаётган испаниялик дарвозабон Икер Касильяс ЕЧЛда 151 та ўйинда майдонга тушган. Агар у "Челси"га қарши ўйинда майдонга тушадиган бўлса ЕЧЛда кўп майдонга тушиш бўйича Хавини ортда қолдиради ва янги рекорд соҳибига айланади.

"Мальмё" - "Реал", чоршанба

Раул ортидан қуваётган Роналду

"Реал" футболчиси Криштиану Роналдуга мадридликлар сафида гол киритиш бўйича Раулнинг 323 та голлик рекордини такрорлашига учта гол етишмаяпти. Олти мавсумда Раулни рекордини такрорлаш яхшигина муваффақият ҳисобланади.


"Бавария" - "Динамо" Загреб, сешанба

Мағлубиятга учрамаётган загребликлар "Бавария"га қарши

Загребнинг "Динамо"си ўзи иштирок этаётган турнирларда 45 та ўйиндан бери мағлубиятга учрамаётган экан. Жамоа сўнгги маротаба ўтган йилнинг ноябрида "Астра"га Европа Лигаси доирасида мағлуб бўлган. Биринчи турда "Арсенал" мағлуб этилди. Бу сафарги рақиб эса жиддийроқ - "Бавария" ва ўйин Мюнхенда бўлиб ўтади.


"Астана" - "Галатасарой", чоршанба

Қозоғистонда илк маротаба Чемпионлар Лигаси

Чоршанба куни Қозоғистонда илк маротаба Европа Чемпионлар Лигасининг гуруҳ ўйинлари бўлиб ўтади. Қўшниларимиз ўша куни Туркиянинг "Галатасарой" жамоасини меҳмон қиладилар. Шуни таъкидлаб ўтиш лозимки, туркияликлар 2013 йилнинг мартидан бери сафарда бўлиб ўтган ЕЧЛ баҳсларида ғалаба қозонмаганлар.

УЕФА расмий сайти асосида Азиз Тўхтамуродов тайёрлади