Етакчилар баҳсини ҳал қилган футболчи ва мураббий, "қалдирғочдек" парвоз қилган Султоновни доғда қолдирган Бошняк — Суперлигада 16-тур лауреатлари

"Championat.asia" ўтказилган баҳслар асосида тур лауреатларини аниқлади.

ОКМК посбони Ботирали Эргашев "Championat.asia" сайти талқинига кўра 16-турнинг энг яхши дарвозабони деб топилди. 

Олмалиқликлар дарвозабони ортда қолган турда қатор сейвларни амалга ошириб, "Олимпик" клуби мағлуб этилишида муҳим роль ўйнади. Рақиб тўпга эгалик қилиш, зарбалар ва стандарт вазиятлар бўйича устунликка эга бўлишига қарамай, маҳоратли футболчи ишончли ўйин кўрсатиб, учрашувни юқори нотада ўтказди ва тур дарвозабони деб тан олинди.

"Пахтакор"нинг ҳужумкор ярим ҳимоячиси Драган Черан "Championat.asia" талқинида 16-турнинг энг яхши футболчиси дея эълон қилинди.  

Майдонда ўзининг аниқ ҳаракатлари билан ажралиб турган Драган Черан "Навбаҳор" билан ўйинда нафақат гол урди, балки кўплаб вазиятларда маҳоратини намойиш қила олди. Сўзимиз исботи сифатида, Черанни ҳаттоки наманганликлар устози Самвел Бабаян ҳам ўйиндан кейинги матубот анжуманида ўйин тақдирини ҳал қилган футболчи сифатида тилга олганини, келтириш мумкин. 

"Андижон" футболчиси Армин Бошнякнинг "Бунёдкор" дарвозасига киритган тўпи "Championat.asia" талқинига кўра 16-турнинг энг чиройли голи (ВИДЕО) деб тан олинди. 

Андижонликлар легионери "қалдирғочлар" билан учрашувнинг 2-дақиқасида 30 метрлардан ажойиб зарба йўллаб, ҳисобни очди. Бундай вазиятда тўпга жон ҳолатда отилган Суҳроб Султонов ҳам ҳеч нима қила олмасди.

"Пахтакор" бош мураббийи Максим Шацких "Championat.asia" талқинига кўра 16-турнинг энг яхши мураббийи сифатида эътироф этилди.

Тошкентликлар ушбу турда Наманганда "Навбаҳор"ни мағлуб этишди (2:1). Нафақат турнинг балки давра, чемпионатнинг муҳим ўйинларидан бири бўлган баҳсда нафақат омад, балки меҳмонлар устозининг баҳсга тўғри тактика танлагани ғалаба омили бўлди. 

Умуман олганда, чемпионлик учун курашдаги рақобат ортганига қарамай, "Пахтакор" керакли паллаларда ўз очколарини жамғариб бормоқда ва "Навбаҳор"ни қувиб ўтиб, яна етакчи бўлиб олди.