Эшитдик-да! "Пахтакор"га қарши ўйиндан сўнг Илёс Зейтуллаев истеъфога чиқарилиши мумкин. Раҳбарият ҳам ўзгаради

Хабарингиз бор, "Бунёдкор" жамоаси спорт директори Ислом Иномов клубдан истеъфога чиқарилди. Маълумотларга қараганда, Иномов ортидан бош мураббий Илёс Зейтуллаевга ҳам чиқиш эшиклари кўрсатилиши кутилмоқда. Бугун "қалдирғочлар" "Пахтакор"га мағлуб бўлган тақдирдагина ушбу ўзгаришлар юз беради. Бундан ташқари бош директор лавозимига академияда фаолият юритиб келаётган, бунгача "Металлург"да узоқ йиллар ишлаган Шавкат Саидов, спорт директорлигига Роман Черников тайинланади. Жамоани бошқа мураббий қабул қилиб олади, лекин у кимлиги ҳозирча номаълум.

Маълумот учун, Иномов ва Зейтуллаев тандеми ўтган йили "Бунёдкор"ни қийин вазиятда Суперлигада олиб қолишга эришган, жамоа кўрсатаётган ўйин барчага манзур келганди. Жорий йилда ҳам жамоа ёмон иштирок этаётгани йўқ. Етакчилар "Нефтчи", "Насаф", ОКМКдан очко олишга муваффақ бўлди.

Афтидан, клуб тепасидагилар аввалги воқеалардан етарлича хулоса чиқаришмаган кўринади.