Эртага охирги муддат! Соат 15:00

Хабарда келтирилишича, Суперлиганинг олтита клубида ПФЛ олдида қарздорлик мавжуд. Булар - "Сўғдиёна", "Қўқон-1912", "Бунёдкор", "Навбаҳор, "Пахтакор", "Бухоро".

Лекин ПФЛ сайти айнан қандай ва қанча қарздорлик борлиги ҳақида очиқ ёзмаган. Фақат 14 август соат 15:00гача қарзлар тўлиқ бартараф этилмаса бу клублардан 3 очко олиб ташланиши ҳақида гап борган. Шунингдек, 22-турдан кейин Суперлига баҳсларидан четлатиш мумкинлиги ҳам келтириб ўтилган.

Энди савол туғилади: модомики гап 3 очко олиб ташлаш ҳақида бораётган экан, демак бу ерда жиддий гап бор. Бу ҳақда ПФЛга мурожаат қилиб, юқорида номлари келтириб ўтилган ҳар бир клубнинг айнан қанча миқдорда қарзи борлиги ҳақида аниқ маълумотга эга бўлишга ҳаракат қилдик. Лекин рақамлар очиқ айтилмади. Фақат мавжуд қарздорлик бадал пули ҳамда баъзи жарималар ва легионерлар учун тўланиши керак бўлган пул эканини маълум қилишди.

Ҳозирги кунга келиб Суперлиганинг иккита клуби мусобақаларда иштирок этиш учун бадал пулини тўлиқ тўламаган. Бу жамоалар - "Сўғдиёна" ва "Бунёдкор". Бошқа клубларда эса бошқа қарздорлик мавжуд. Кўрамиз, эртага 15:00гача ҳамма қарздорлик бартараф этиладими? Шундан сўнг ПФЛга яна мурожаат қиламиз.