Эрон ФФ Кейрушга 8 йиллик ҳамкорлик учун миннатдорчилик билдирди

Осиё Кубоги ярим финалида Япониядан учралган 0:3 ҳисобидаги мағлубият портулиялик мутахассис учун Эрон терма жамоаси бош мураббийи сифатида охирги ўйини бўлиб қолди.

Ушбу қитъа биринчилигида Кейруш олтин медалларни қўлга киритишни мақсад қилганди, бироқ бу насиб этмади. Шунга қарамай 8 йиллик фаолият учун Эрон футбол федерацияси Карлуш Кейрушга ўз миннатдорчилигини билдирди. Кеча мураббий Эрон ФФнинг Теҳрондаги офисига ташриф буюриб раҳбарият билан учрашди ва ўзаро ҳамкорликни тўхтатаётганини маълум қилди.

Дарвоқе, Японияга қарши баҳс Карлуш Кейруш учун форслар бош мураббийи сифатида 100-ўйин бўлди. Эрон билан 100та беллашув ўтказган Кейруш шундан 60тасида зафар қучди, 27 бор дуранг ўйнаб, 13 марта имкониятни бой берди. Албатта, буни яхши натижа деса бўлади.

Яна бир маълумот шуки, терма жамоани энг узоқ муддат бошқарган ҳам айнан Карлуш Кейруш бўлди. Эндиликда унинг Колумбия терма жамоасида ишлаши кутиляпти.