Энтони Хадсон: "Ўзбекистонга қарши жиддий тайёрландик"

- Бўлажак ўйинга эътибор жиддий. Ўзбекистон терма жамоаси кучли рақиб, бу баҳс биз учун синовга бўлади. Эртага стадионга кўплаб мухлислар келишига умид қиламан, -деб гап бошлади Хадсон.

Уинстон Рид: - Мураббийимиз айтганидек, ўйинга яхши тайёргарлик кўрдик. Рақиб таркибида яхши савияли футболчилар мавжуд. Баҳс шиддатли кечади.



- Сиз Баҳрайнда бир неча йил ишлагансиз. Ўзбекистон ҳақида нималарни биласиз?
- Бу жамоа кучли ва тажрибали футболчиларга эга. Жамоа Осиёнинг энг кучли жамоаларидан бири. Биз бу ерга чиройли ўйин кўрсатиб, ғалаба қозониш учун келганмиз.

- Эртага мағлубиятга учраган тақдирда танқидлар остида қолмайсизми?
- Бу ҳолатга биз тайёрмиз. Бизни барибир танқид қилишади. Футболда бу бор нарса. Ўзбекистон Осиё Кубогига тайёргарлик кўрмоқда. Биз эса майдонга чиқиб, ўз ўйинимизни намойиш этамиз.

- Жамоа Тошкентга асосий таркиб билан келдими?
- Ҳа, 70 фоиз футболчиларимиз жамоа сафида 20дан ортиқ ўйинда иштирок этишган. Бу асосий таркибимиз.



Уинстон Рид: - Мен 2007 йилдан буён терма жамоа шарафини ҳимоя қиламан. Аста-секин ўсиб боряпмиз. Тошкентга асосий таркибда ташриф буюрдик.

- Кучли бешлик чемпионатларида ўйнайдиган футболчилар учун эртанги баҳсга тайёрланиш руҳий тарафдан қийин бўлмайдими?
- Йўқ, бизда бу борада муаммо йўқ. Футболчиларнинг бари профессионал, улар ҳар бир беллашувга жиддий ҳозирлик кўриш кераклигини яхши англаб туришибди.

- Нега йиғин Дохада олиб борилди? Доханинг иқлими Тошкентдан анча фарқ қиладику.
- Шунчаки у ерда йиғин ўтказишга барча шароитлар бор. Бундан ташқари Дохадан Тошкентга етиб келиш қулай ва тез эди.