Элдор Шомуродов: "Яхшибоевнинг голидан хурсанд бўлдим. Рим дербисидаги мағлубиятни унутдик"

"Лацио"га қарши баҳс оғир ўтди ва биз ютқаздик. Аммо ўша ўйинни унутдик ва олға интилишда давом этамиз. Энди фақат "Заря" билан ўйин ҳақида ўйлаяпмиз", - деб гап бошлади Шомуродов.

- Ҳозир ҳамма ўзбек футболи ҳақида гапирмоқда. Ўз вақтида "Динамо" афсонаси Максим Шацких "Реал"га гол урган, кеча Яхшибоев "Реал" дарвозасини ишғол қилди. Ҳозир футболда сенсация кўпайиб кетди. "Заря" ҳам сизларни хайрон қолдириши мумкинми?
- Ҳозир футболда кучсиз жамоалар йўқ деб ўйлайман. "Заря"га қарши қизиқарли баҳс бўлади деб ўйлайман. Улар ҳам, биз ҳам майдонга ғалаба учун тушамиз. Ғалаба учун боримизни берамиз.

- Рим дербисида иштирок этдингиз, таассуротлар қандай? Бундай қийин баҳсдан кейин Конференциялар лигасидаги ўйинга тайёрланиш қандай бўлди?
- Таассуротлар шунчаки ажойиб. Айниқса мухлислар стадионга келгани алоҳида аҳамият касб этди. Бунгача бошқа дербиларда қатнашганман аммо уларда мухлислар йўқ эди. Бу - футбол, унда исталган нарса бўлади. Ўша мағлубият ҳақида кўп ўйламаймиз ва барчамиз "жаҳлдормиз". "Заря" билан баҳсга бор эътиборимиз қаратилган.

- Украинада олдин бўлганмисиз? Бу мамлакат ҳақида қандай фикрдасиз?
- Йўқ, Украинага олдин келмаганман. Илк бор келишим. Украина терма жамоаси кучли ва футболчилари ҳам анча кучли.

- Барча сизни ҳозир ўзбек футболининг ёрқин юлдузи деб ҳисоблайди. Аммо кеча Жасур Яхшибоев бу номни сиздан олиб қўйгандек туюлди. Унинг голидан хайрон қолдингизми?
- Яхшибоевнинг голини кўриб албатта хурсанд бўлдим. У гол урди ва "Реал"ни мағлуб этишди. Аммо ўзимни юлдуз деб ҳисобламайман. Балки бу ерда кўпчилик билмас Ўзбекистонда яхши футболчилар кўп ва улар юлдуз ҳисобланади.

- "Рома"га тез мослашиб кетдингиз ва ажойиб самарадорлик кўрсатаяпсиз. Бу нима билан боғлиқ?
- Сабабларидан бири бундан олдин Италияда бир йил "Женоа"да ўйнадим. "Рома"га ўтганимдан кейин эса футболчилар жамоага мослашиб кетишим учун қўлдан келганича ёрдам беришмоқда.