Эксперт фикри. Санжар Турсунов: "Шу руҳда давом этсак Миср ҳам, бошқа рақиблар ҳам қўрқинчили бўлмайди"

Фабио Каннаваро бошчилигидаги Ўзбекистон миллий терма жамоаси ўртоқлик учрашувида Мисрни мағлуб этган бўлса, U-17 терма жамоамиз Жаҳон чемпионати 1/16 финалида Хорватияни таслим этди. Бу ўйинлар юзасидан собиқ футболчи Санжар Турсуновнинг фикрлари билан қизиқдик.

– Эксперт сифатида ўйинларни стадиондан кўраётган мутахассис сифатида U-17 терма жамоамизнинг иштироки сизда қандай таассурот қолдиряпти?
– Гуруҳ босқичидаги Панама билан ўйинни стадиондан кузатдим. Биринчи бўлимда ўйинимиз қовушмади, иккинчи бўлимда эса Ислом Исмоилов амалга оширган ўзгаришлар, захирадан тушган футболчилар ўйинни яхши томонга буришди. Аслида бу ўйин бизники эди. Биринчи голни урганимизда яна 1–2 та гол киритишимиз мумкин эди. Лекин ўйин бошқача кечиши ҳам эҳтимол эди — Панама пенальтини голга айлантира олмади. Фикримча, рақиб ҳисобни тенглаштирган тақдирда ҳам бизда имконият бўларди. Йигитлар ўйиндан-ўйинга ўсишмоқда. Ҳозирги босқичда ҳар бир учрашув битта имконият: ким яхши тайёрланса, ўша кейинги босқичга чиқади. Ортда қолган ўйинларга қараб “яхши ўйнадик” ёки “ёмон ўйнадик” дейиш тўғри эмас. Ҳар бир учрашувда энг яхши ўйинни кўрсатиш талаб этилади.

– Рақиблардан устун жиҳатимиз нимада кўриняпти? Буни Италияга қарши ўйинда ҳам амалга ошира оламизми?
– Устунлигимиз, аввало, жамоавий руҳ ва жамоавий ўйинда. Албатта, таркибда индивидуал маҳоратга эга футболчилар ҳам бор. Лекин айнан бундай ижрочиларнинг кўп эмаслиги бизнинг фойдамизга ишлаяпти, десам тўғри бўлади. Чунки кўп жамоалар индивидуал жиҳатдан кучли футболчиларга орттиқча суяниб қолишади. Улар эса баъзи ўйинларда жисмонан етарлича тайёр бўлмайди. Бизда эса энг катта куч – жамоавий ҳамжиҳатлик.

– Миср билан ўйиндаги натижа шунчалик ажабланарлими ёки кучли рақиблар билан ўйнаб юрганлик тажрибаси қўл келдими?
– Мисрга қарши ўйинни ҳам стадиондан кўрдим. Биринчи бўлимда бу рақибдан ўйин сифати бўйича юз фоиз устун эдик. Ҳисоб ҳам бизга қулай эди. Иккинчи бўлимда эса йигитлар ҳисобдан келиб чиқиб ўйнашди, чунки 2:0 эди. Қарши ҳужумларда яхши вазиятлар юзага келди. Терма жамоамиз рақибга нисбатан тўғри тактика қўллади ва майдондаги футболчилар ҳам тажрибали эди. Гол ўтказмасдан бизга керакли натижани қўлга киритдик. Футболда натижа биринчи ўринда туради, шу боис тўп билан камроқ муомала қилинди. Бу ўйинни ташлаб қўйдик дегани эмас — бу тактик ёндашув эди. Миср жамоасида захирадан тушган футболчилар ўйинни кучайтирди. Анча вақтдан бери бундай ғалабаларни соғингандик. Бу ғалабалар футболчиларга катта ишонч бағишлайди.

– Каннаваро қўл остида 3 та ўйин ўтказдик. Мураббийнинг чизгилари сезилмоқдами?
– Ўйинни яқин дўстларимиз билан бирга томоша қилиб, таҳлил қилиб ўтирдик. Терма жамоамизда ўйин суръати бор ва бу нарса кутилганидан тезроқ шаклланди. Жамоавий ва индивидуал ўйинимиз кўзга ташланяпти. Шу руҳда давом этсак, Миср ёки бошқа рақиблар қўрқинчли туюлмайди. Йигитлар ўйинга юз фоиз кучини беряпти. Футболчиларнинг руҳий тайёргарлиги ва мураббий кўрсатмалари самара бераётгани бўйича ишонч бор. Ўйлайманки, тўғри йўлдамиз. Ўзбекистон учун ҳар доим қайғурамиз, мухлислик қиламиз.