Егор Кримец: "Ҳали ҳеч бир ўйинга бу даражада тайёргарлик кўрмагандик"

"Тайёргарлик жуда маромида бўлди. Гуруҳимиздаги ҳали ҳеч бир ўйинга бу даражада тайёргарлик кўрмагандик. Рақибни обдон ўргандик. Уларнинг охирги вақтларидаги кўплаб ўйинлари туширилган дискни томоша қилдик, мураббийлар керакли маслаҳатларни беришди. Баҳрайннинг ожиз нуқталари ҳақида машғулотлар пайтида мураббийларимиз бизни бохабар қилишди", - дея гап бошлади Егор Кримец.

- Сўнгги пайтларда Кримецнинг ўйинларида пасайиш кузатилмоқда. Бунинг сабаби нимада?
- Билмадим. Ҳар бир ўйинга бир хил маромда ўйнашга ҳаракат қиламан. Ўйинга тайёргарликни доимгидек юқори даражада ўтказаман. Сўнгги ойларда жуда кўп ўйинларда иштирок этганим боисми, балки бироз чарчоқ аломатлари сезилаётгандир. Мавсум якунига етиб бормоқда. Жисмоний толиқиш бўлиб туради. Шу нарса ўз сўзини айтаётган бўлиши мумкин.

- Ҳимоя чизиғи деярли янгиланди. Ўзаро тил топишишда муаммолар йўқми?
- Ўйиндан-ўйинга бир-биримизни тобора яхши тушуниб оламиз. Бунинг учун учрашувлар керак. Вақт ўтиши билан ҳаммаси изига туши кетади деб ўйлайман. Дарҳақиқат, ҳимоя чизиғимизда янгиликлар бўлди. Учрашувлар орқали орқа чизиқдаги ўйинимизни янада шакллантириб оламиз.

- Баҳрайнга қарши ўйин олдидан жамоанинг ғалабага бўлган ишончи қай даражада? Руҳий томонлама тайёргарлик маромидами?
- Майдонга фақат ғалаба учун тушамиз. Бизни мақсад ва режа битта - ғалаба. Орқага йўл йўқ. Гуруҳимиздаги вазият шуни тақозо қилади. Ғалабадан ўзгаси бизни қониқтирмайди. Жамоада ички муҳит жуда яхши. Кайфиятлар аъло. Руҳий томонлама керакли тайёргарликка эгамиз. Барчамиз ғалабага ташнамиз.

Шаҳбоз Беғамов суҳбатлашди.