Драган Черан: "Мухлисларнинг майдонга турли хил буюмларни улоқтириши футболга хос эмас"

Жанговар дуранг 3:3 ҳисобида якунига етган беллашувдан сўнг меҳмонларнинг сербиялик легионери Драган Черандан ўйин ҳақидаги фикрларини ёзиб олдик.

"Жуда яхши атмосфера ва шунга мос ажойиб ўйин. Рақиб ҳар доимгидек ғалаба қозониш учун тараддуд кўрган. Ўйлашимча, биз яхшироқ ўйнадик. Шунчаки, бироз омадимиз келмади. Стандарт вазиятлардан иккита гол ўтказиб юбордик, шуни устида ишлашимиз керак.

Бугун мана шундай кескин ўйинни кутган эдик. Улар уйда мана шундай футбол кўрсатишади, уларнинг услуби шундай. Лекин, бугун уларга омад кулиб боқди.

Мухлислар "Навбаҳор"ни одатдагидек қўллаб-қувватлаб туришди, улар ҳамиша шундай. Лекин, бугун улар бироз нопрофессионал ҳаракатларни амалга оширишди. Майдонга елим идишлар ва яна бошқа буюмларни улоқтиришди. Менимча, бу ҳолат учун жарима қўллаш керак. Чунки, бу футбол эмас, футболга хос ҳолат эмас.

Ўйиндан сўнг кийиниш хонасида видеоёзувни кўрдик. Машариповни голи ҳисобланмаган вазиятда Жалол ҳеч қандай оффсайдда эмас эди. Бу яққол кўриниб турибди. Афсус...", - дея фикрларига якун ясади Черан.

Эслатиб ўтамиз, Драган "шерлар"нинг ўйиндаги биринчи голига муаллифлик қилган эди.

Толибжон Қосимов суҳбатлашди