Диёр Мирзабоев: “Имкониятлардан фойдаланганимизда ҳисоб йирик кўринишга келган бўларди”

- Ўйин ҳақида
- Оғир учрашув ўтказишимиз билдардик. Чунки “Ғиждувон” ўз майдонида ҳали мағлубиятга учрамаганди. Ўз майдонида ҳар қандай рақибга жиддий муаммолар келтириб чиқаришини билардим. Қолаверса, таркибимизда ҳам йўқотишлар бор эди. Жароҳат ва сариқ карточкалар кўпайгани ишимизни оғирлаштирарди. Захира ўриндиғимиз камчиликни ташкил қилган бўлса-да, йигитлар ҳарактер кўрсатишди. Кўплаб имкониятларга эга бўлдик. Балки, улардан фойдаланганимизда ҳисоб камида 3:0 бўлиши ҳам мумкин эди.

- Жамоа ҳужумчиларсиз ўйнамоқда. Бу сизни ташвишга соляптими?
- Албатта, ташвишга солмоқда. Лекин охирги баҳсларимизга эътибор қаратсангиз, бизда ҳужумчилар эмас, бошқа позициядаги футболчилар тўп киритмоқда. Бизда ҳамма голни фақат ҳужумчилар уради деган жойи йўқ. Кимда имконият бўлди, у тўп киритиши шарт.

- Тез орада трансфер ойнаси очилади. Таркибни кучайтириш режаси борми?
- Ҳозирги таркибдан кўнглим тўқ. Лекин имконият бўлса, айрим чизиқларни кучайтириш учун бир нечта футболчиларни таклиф қилишимиз мумкин.

- Жамоа 5-ўринга кўтарилиб олди. Вазифалар ўзгардими?
- Бу вақтинчалик ҳолат деб ўйлайман. Олдинда муҳим ўйинлар кутиб турибди. Қачонки иккинчи давра якунланиб, жамоа 5-ўринда бўлса, вазифа бажарилган бўлади. Қолаверса, жамоалар иккига бўлинади, шунда юқори ўринлар учун курашувчи жамоалар томонида бўлсак, унда биз ўз олдимизга қўйган мақсадга эришган бўламиз.