Диёр Имомхўжаев: "ЎФА тавсиясига кўра чемпионат ўйинларини 15 августга қадар қолдиришга қарор қилдик"

Жонли эфир давомида ПФЛ директори вазифасини вақтинча бажарувчи Диёр Имомхўжаев барчани қизиқтирган айрим саволларга жавоб бериб ўтди. Хўш, Суперлига нима сабабдан тўхтатилди?

"Биз бундан олдин Суперлига баҳсларининг 3-15 август оралиғида Тошкентда марказлашган ҳолатда ўтказилишини маълум қилгандик. Бугун биз ЎФАдан хат олдик. Улар ҳозирги пандемия шароитида, одамлар қийналаётган пайтда мусобақани қолдиришни тавсия қилишди. Терма жамоалар учун масъул ташкилот. Қолаверса футболни ушлаб туришдан мақсад халқаро майдон эди. Айтайлик миллий жамоамиз Жаҳон чемпионати саралаш босқичида, Темур Кападзе мураббийлигидаги ёшлар терма жамоамиз Осиё чемпионатида иштирок этишини яхши биламиз. ЎФА шунақа тавсия бергандан кейин биз шароитдан келиб чиқиб 15 августга қадар чемпионат ўйинларини тўхтатиб туришга қарор қилдик. Агарда терма жамоалар манфаати йўлида бўлганда чемпионат давом этгани яхши эди. Августда "boxing day"да футболчиларнинг жисмоний тайёргарлиги, жанговар руҳияти зўр бўларди. Бу ерда нафақат футболчиларнинг соғлиғи, балки стадион майсасидан тортиб оддий ишчиларнинг соғлиғидан келиб чиқиб шундай қарорга келинган бўлса керак. Чунки, ўйинларни ташкил қилиш учун майдон ташқарисида бир қанча инсонлар меҳнат қилади",- дейди Диёр Имомхўжаев.