"Динамо": Шихов энг сермаҳсул, Саматовда энг кўп ўйин

ЭНГ КЎП ЎЙИН

Жамоамизнинг дастлабки давра ўйинларида энг кўп майдонга тушган футболчи бу - Алишер Саматов бўлди. Ўнг қанот ҳимоячиси бўлиб ўтган барча – 13 учрашувда майдонга тушиб, 1150 дақиқа давомида майдонда тўп сурди. Бу орада у 3 маротаба сариқ карточка билан «сийланган». Майдонда ўтказилган дақиқалар бўйича кейинги икки ўринни Асрор Алиқулов 1080 дақиқа ва Андрей Мельничук 1064 дақиқа билан эгаллаган. Уларнинг давра давомидаги ўйинларда майдонга тушиши 90% дан ортиқ.

ЭНГ СЕРМАҲСУЛ ФУТБОЛЧИЛАР

Жамоамизнинг энг сермаҳсул футболчиси Санъат Шихов бўлди. 24 ёшли футболчи 12 учрашувда 1023 дақиқа тўп суриб, бу орада 4 маротаба рақиблар дарвозасини ишғол этишга эришди. Шунингдек, жамоамизнинг 3 та голига ҳаммуаллифлик қилди. Шунингдек, Абдулло Набиев, Зайниддин Тожиев ва Ғулом Уруновлар 2 маротабадан рақиблар дарвозасини ишғол этишди.

ЭНГ КЎП «СИЙЛАНГАН»ЛАР

Жамоанинг энг барқарор ва қўпол футболчилари қаторини марказий ҳимоячиси Илдар Маматказин бошқариб турибди. Ушбу футболчи 11 ўйинда 5 маротаба ҳакамлар томонидан огоҳлантирилган. Кейинги ўриндаги универсал футболчи Акмал Холмуродов эса 10 та учрашувда 3 маротаба огоҳлантирилган ва бир марта майдондан четлатилган. Зайниддин Тожиев ҳисобида ҳам 4 та сариқ карточка мавжуд.

ЭНГ ФАХРИЙ ВА ЭНГ ЁШ

Биринчи давра давомида жамоамизда тўп сурган энг ёши катта футболчи – 37 ёшли тажрибали ҳужумчи Зайниддин Тожиев бўлди. Энг ёш футболчилар яқинда 18 ёшини қаршилаган Муҳаммаджон Ражабов ва Холмўмин Давроновлар бўлишди.

ДЕБЮТАНТЛАР

Жорий йилда Самарқанд жамоасининг уч нафар футболчиси Олий лигада ўз дебютини ўтказди. Хусусан, Муҳаммаджон Ражабов, Холмўмин Давронов ва Акбар Сиддиқовлар фаолиятларида илк марта чемпионат баҳсларида майдонга тушишди.