Дилшод Жабборовнинг сариқ карточкаси нечта?

Учрашувдан олдин наманганликлар сафида кичик тушунмовчилик юзага келган. Яъни, "Навбаҳор" олий лига 5-турида "Бунёдкор" меҳмони бўлган эди. Ана шу учрашувнинг 21-дақиқасида Дилшод Жабборовга сариқ карточка кўрсатилгани протоколда қайд этилган эди. Ваҳоланки, ўша баҳсни бевосита стадиондан туриб матнли трансляция қилган сайтимиз ходими ҳам, "Бунёдкор" ва "Навбаҳор" клубларининг расмий твиттер аккаунтлари ҳам ўша вазиятда бош ҳакам Дмитрий Пислегин сариқ карточкани Жабборовга эмас, Роббим Ҳасановга кўрсатганини ёзишган эди. "Навбаҳор" матбуот котибининг маълум қилишича, ўйиндан кейин учрашувнинг тасвири қайта кўриб чиқилганда ҳам сариқ айнан Роббим Ҳасановга кўрсатилгани маълум бўлган. Лекин, ўйиннинг расмий протоколида Жабборовга сариқ кўрсатилган деб ёзилган.

Олий лиганинг сўнгги турида Дилшод Жабборов сариқ карточка олди, агар "Бунёдкор" билан ўйиндаги "сариқ" билан қўшиб ҳисобласак "Навбаҳор" сардорининг сариқлари 4тага етди ва у бугунги "Локомотив"га қарши баҳсни ўтказиб юбориши керак. Аслида эса унинг сариқ карточкалари учта.

Олган маълумотларимизга қараганда "Навбаҳор" вакиллари ана шу ишга аниқлик киритиш мақсадида ЎФФ га мурожаат қилишган. Агар бугун Жабборов майдонга тушмаса, унинг номига "Бунёдкор"га қарши учрашувда "ёзилган" сариқ карточка ўз кучида қолган бўлади ва футболчи олий лига 11-турида карточкалардан "тозаланган" ҳолда ўйнаши мумкин.

Эслатиб ўтамиз, "Локомотив" - "Навбаҳор" учрашуви 18:00 да бошланади.