Диего Симоне: “ЧЛда “Реал”ни мағлуб этолмагандик. Бугун буни уддалладик”

“Захирадан майдонга тушган футболчилар бизга катта ёрдам беришди. Корреа, Витоло, Хименес ва Томас ажойиб ўйин кўрсатишди. Ҳисоб 2:2 бўлгач, футболчиларим ўйин “темпи”ни ошириб боришди. Бизда иқтидорли футболчилар жамланишган. Бугун улар ҳар томонлама ўзларини кўрсата олишди. Улар шундай ҳаракат қилишса, бизда ғолиб чиқиш учун кўплаб имкониятлар бўлади. Томаснинг майдонга тушиши ўйинимизни ўзгартириб юборди. 

“Реал” анчадан буён еврокубоклар финалида мағлуб бўлмаётган эди. Биз “Реал”га қарши финалларда ўзимиз истаган натижани қўлга кирита олмаганмиз. ЧЛда биз уларни мағлуб этолмадик. Бугун ғолиб чиқиш насиб этди. Бу ўзимизга бўлган ишончни кучайтиради. Бугун биз байрам қиламиз. Эртадан бошлаб “Валенсия”га қарши беллашувга тайёргарликни бошлаймиз. 

Қаторасига икки марта финалда ютқазганимдан сўнг руҳий жиҳатдан қийин ҳолатга тушиб қолгандим. Келажагим ҳақида ўйлай бошлагандим. Аммо ҳозир бу ҳақда ўйлашнинг мавриди эмас. Бугун ғалаба қозондингми, сендан яхшиси бўлмайди. 

Биз учрашувни яхши бошладик. Костанинг тезкор голи бизга куч берди. Пеналти – ўйиннинг энг кутилмаган “нуқта”си бўлди. Шундан кейин тенг баҳс кечди. Ўзгаришлар ҳал қилувчи роль ўйнади – биз яхшироқ ҳаракат қила бошладик. 

Дисквалификация? Бугун минбарда жудаям совуқ эди. Яхши томони юқоридан туриб ўйинни томоша қилиш ва футболчиларнинг ҳаракатларини яхшироқ таҳлил қилиш имкониятига эгалигим эди. Аммо сен майдонда эмас экансан, жамоа ва ёрдамчилар билан алоқа йўқолади”, деди Симоне.